Covid-19 vei tawh zat 677 Niminah mi 5 an chhuak

August 13, Ningani khan Mizoramah Covid-19 vei mi 15 hmuh chhuah a ni a, nimin khan mi paruk hmuh belh a ni bawk. Hetih lai hian, nimin khan Covid-19 vei dam tawh mipa panga chhuahtir an ni a; hripui kai tawh mi 677 zinga mi 348 chhuak an chhuak tawh.

Hripui vei dam tawh nimina chhuahtirte chu - State Referral Hospital-a enkawl mi pali - BSF sipai pakhat, police pahnih leh SIB mi pakhat leh, Covid Care Centre (CCC), Tribal Art Centre, Tanhril aṭangin mi pakhat an ni. Mizoramah hripui vei hmuh tawh zat chu mi 677 an ni a, an zinga mi 348 (51.40%) chu chhuahtir tawh niin, mi 329 (48.60%) an la chhuak lo. La chhuahtir loh zingah Covid-19 vei tawh (negative tawh) mi eng emaw zat an awm.

Ningania ZMC laboratory-ah swab sample 237 endik niin, a tam ber (220) chu Aizawl district-a mi an ni a, Kolasib aṭangin 11, Champhai aṭangin pakhat leh Silchar lam mi panga endik a ni bawk.

Covid-19 vei mi pahnih hmuh chhuah thar zinga pakhat zawk chu hmeichhe naupang kum 6 mi, Chal­tlang Lily Venga awm a ni a; tun hnaia hripui vei tih ZMC-a hmuh chhuahte aṭanga kai nia hriat a ni. Pakhat dang chu mipa kum 32 mi, tun hnaia Kolkata aṭanga haw, quarantine centre-a awm lai a ni thung.

Ningani vêk khan Rapid Antigen Test hmangin eng emaw zatte swab sample endik a ni a, Covid-19 vei Aizawl district-ah mi pathum hmuh chhuah a ni bawk a; an nihna chiang zawk erawh sorkar thuchhuakah tarlan a ni lo.Lunglei Civil Hospital laboratory-a TrueNAT-PCR hmanga swab sample 29 endik zingah Covid-19 vei mipa pahnih hmuh chhuah a ni bawk a; tun hnaia Bihar aṭanga haw kum 19 leh 45 mi, quarantine centre-a awm lai an ni.

August 13 khan RAT hmangin Kolasib district (Vairengte checkgate)-ah hripui vei mi pariat hmuh chhuah an ni a, chu'ng zinga chhun lama hmuh chhuah pasarihte chu nimina chhuak Vanglaini-ah tarlan a ni tawh a, pakhat erawh chu zan lama hmuh chhuah a ni. August 13-a Covid-19 vei hmuh chhuah zawng zawng chu mi 15 an ni. Vairengte-ah vêk hian nimin khan tlai dar 5 thlengin Covid-19 vei mi paruk hmuh chhuah leh a ni a; an vaiin Assam aṭanga rawn lut hnam dang, driver leh handyman-te an ni.

Vairengte checkgate-ah hian August 10, 2020 chawhnu lam aṭanga swab test tih a nih hnuah Mizo 217 leh hnam dang 1,293, an vaiin mi 1,510 endik tawh a ni a; hripui vei mi 32 hmuh chhuah a ni tawh a, taksaa harsatna nei lo vek an ni. Mi 32 zinga mi 31 chu hnam dang driver/handyman-te niin, pakhat chu Excise & Narcotics department mi a ni thung.