Covid-19 vangin PAHOSS a khaihlak

Urban Development & Poverty Alleviation (UDPA) department changtu deputy chief minister Tawnluia chuan, Parking House Support Scheme (PAHOSS) chu Covid-19 vangin kalpui chak theih a nih loh thu a sawi.

Vanglaini palai zawhna chhángin Tawnluia chuan, PAHOSS atan dilna a luh reng thu a sawi a, "Dilna lo lutte chu lo dawn zel a ni. Chutih rualin, dilna lut reng reng hi a hmunah endik zel a ngai a, Covid-19 avangin hun eng emaw chen endik hleih theih a ni lo. Parking siamna hmun tur an nei ngei em, eng zat nge lirthei leng dawn tihte uluk taka endik a ṭul a ni," a ti.

Dy Chief Minister chuan, sorkar official-te hnenah PAHOSS aṭanga ṭanpuina la pek theih zat chhût chiang tura an hrilh thu sawiin, "PAHOSS dawng tur thlangtu zingah hian minister emaw MLA tel an awm lo a, official vekin a thlan hna an thawk," a ti a; hmun lûn lai deuh, traffic jam rehna atana ṭangkai tur thlang hmasa turin thurâwn a pek thu a sawi.

Kum 2019-20 Mizoram budget-ah PAHOSS atan cheng vbc. 6 leh kum 2020-21 budget-ah cheng vbc. 10 dah a ni.  Mi eng emaw zat hnenah ṭanpuina pek a ni tawh. PAHOSS hi chief minister Zoramthanga'n Aizawl khawpui traffic tâwt lutuk tihziaawmna atana ruahmanna a siam a ni a, mahni ina lirthei dahna hmun siam theite chu lirthei dah tam theih dan ang zela ṭanpuina pek ṭhin a ni. February  6, 2019 khan tlangzarh a ni.