Chapchar Kut hlim taka hman a ni

Lammuala Chapchar Kût hmannaah hian Art & Culture minister R Romawia chu Kût Thlengtu a ni a, Home Minister chu Kût Pa a ni. R Lalzirliana chuan Chapchar Kut chu pipute nunze mawi tlawmngaihna leh aia upate zahna Mizo thinlungah par chhuah tir lehtu nise a duh thu sawiin, kut hmangtute chu innghirhona tel loa, induhsak tawnna nen hlim taka hmang turin a chah.

R Lalzirliana chuan pi leh pute'n Chapchar Kut an hman ṭhin danah khawtlang inlungrualna a lan thu sawiin, "Hei hian rah ṭha a chhuah
ṭhin. Tun laiah political party hrang hrang awmin, ram hruai tum dan a in ang lo a, inhnial changte a awm ṭhin. Mah se, hnam issue-ah chuan political party zawng zawngte hi kan ṭanho a ngai a ni," a ti.

Mizo hnam dinchhuahna atan ei leh bara intodelh a pawimawh tih sawiin Home Minister chuan, "Ei leh bara intodelh turin inlungrualna nen kawng kan ngaihtuah a ngai. Sorkar hmalakna ṭawiawm a, a hlawhtlinna tura ngaihtuahna kan sen tlan a ngai," tiin, Mizo mipuite chu Chapchar Kut duhsakna hlan a ni.

Kut Thlengtu R Romawia chuan Pathianin Mizofate hnamah siamin, hnamzia pholanna remchang atan kut min pek thu sawiin, "Kan hnamzia ngaihhlut a, chhawmnun zel hi kan bat a ni," a ti a, kut hmangtute chu hlim tak, lawm tak leh phur taka kut hmang turin duhsakna a hlan.

Inlawmna thusawitu, CYMA president Lalbiakzuala chuan, Mizo thuam inbel a, a hlim hlawp leh hnam lam entirna atan ringawt Chapchar Kut chu hman tur a ni lo tih sawiin, "Pi leh pute nunze mawi chhawm nunna atan leh midangte ṭanpui nan i hmang ang u," a ti.

Chapchar Kut hian Zofate inpum-khatna kawng min zawhtir se a duh tih sawiin CYMA President chuan, inlahrang zawnga awm loa, inngeih tlang taka cheng turin Zohnahthlak zawng zawngte a sawm a ni.

Lalbiakzuala chuan mahni cul-ture ngaihsan a ṭul tih sawiin, "Mahni culture hi zahpui chi a ni loa, hmasawn san chi pawh a ni lo. Lehkhathiam san chi pawh a ni hek lo," a ti.

Chapchar Kût hmannaah hian Mizo nun zia chi hrang hrangte tarlan a ni a,zaithiamte an zai bakah, hnam lâm hrang hrang entir a ni.

Lammuala hun hman a nih bakah Chapchar Kut pual hian Assembly Annexe-ah flower exhibition, Vanapa Hall-ah photo & painting exhibition leh Lammualah handicraf/handloom & food exhibition buatsaih a ni.