KHAWTHLIR

Session zawhna

March 17 aṭanga Mizoram Legislative Budget Session neih tur-ah zawhna, House-a chhan chi (starred question) pariat leh ziaka chhan chi (unstarres question) 197 a lut tawh. Session atan hian bill pahnih - Joint Electricity Regulatory Commission (JERC) for Mizoram and Manipur Annual Report 2014-2015 leh The Mizoram State Public Sector Enterprise Early Retirement Rules (ERR), 2015 a lut tawh a ni.

Inception Workshop

Mizoram sorkar leh UN thawhhona kal zelah Ningani khan NLUP conference hall-ah Food and Agriculture Organisation (FAO) Inception Workshop buatsaih a ni a, minister Lalrinmawia Ralte-in a hmanpui.

Tuiah tla hlum

Roluahpuii (13) d/o Laldawna, Darlawn chu Ningani chawhma dar 11:30 vel khan Tuivawl luiah a tla hlum. Thudawn danin, Roluahpuii sikul kalna Public Middle School chu Tuivawlah hian inthlahna hun hmangin an kal a, Roluahpuii hi chesualin, a chetsualna aṭanga hnaiteah thia hmuh a ni.

Champhaiah CM

Chief minister Lal Thanhawla chuan KṬP General Conference hmanpui turin nimin khan Champhai a pan. Ruahman lawk dan chuan Chief Minister hian Thawhṭanniah Aizawl a rawn pan leh dawn a ni.

Awareness programme

Mizoram Chamber of Industries (MCI) leh Quality Control of India (QCI) chuan nimin khan industry neitu leh sumdawngte tan awmze nei zawk leh hlawk zawka thil siam chhuah zirna Awareness Programme on Lean Manufacturing an buatsaih.

Loneitute zirtir

KVK Lawngtlai district chuan Ningani khan RKVY programme hnuaiah Kawlchaw West-a loneitute thlai venhim dan an zirtir. KVK hotute chuan loneitute tan engtik lai pawha an inhawn reng thu hrilhin, inthlahrung loa, an harsatnate an hnena thlen ṭhin turin an chah a, "Nangmahni ṭanpui turin kan awm reng a ni," an ti.