Hmun hrang hrangah Chapchar Kut hman a ni

Nimin khan Mizoram hmun hrang hrangah Chapchar Kut hman a ni a, Lungleiah chuan Ṭhuamluaia Mualah hman niin, minister Zodintluanga chu Kut Pa a ni.

Zodintluanga chuan Mizote Mizo kan nihnaah kan chian hle ngaia a hriat thu sawiin, "Ram changkang zawkte tihdan kan zirna lamah kan Mizo identity bo vek khawpin kan khawsa ang tih ka hlau ?hin. Sâp leh Korean-te hi án kan tum vek mai ang tih ka hlau em em a ni," a ti.

Mizoten kût kan neih zinga pawimawh ber Chapchar Kut kan thleng leh chu lawmawm a tih thu sawiin Zodintluanga chuan, "Mizote min phuarkhawmtu kût pawimawh tak a nih avangin kan hnam nunphung leh tihphung kan vawnṭhatna pawimawh tak a ni," a ti a, Chapchar Kut chu Mizo nuna kan hnam zia pholangtu pawimawh tak a nih thu a sawi.

Saiha-ah chuan Chapchar Kut hi district playground-ah hman a ni a, Saiha DC R Zarzosanga chu Kut Pa a ni.

Kut lawmnaah hian kumina naupang huaisente chawimawina National Bravery Award dawngtu Ramdinthara (16) hnenah chawimawina thuziak leh thilpek dangte Chapchar Kut Organising Board, DC Office leh MCHP Hqrs. ten an hlan.

Chapchar Kut hi Lawngtlaiah chuan Lai kut Hlukhla Kut nen a rualin CYLA playground-ah hman a ni a, minister C Ngunlianchunga chu Kut Pa a ni.

C Ngunlianchunga chuan, hnamin a ziarang a hloh chuan hnam chu a bo ta tihna a nih thu sawiin, "Chuvang chuan keini Zofate hian kan hnam ze hrang hrang, mawi tak takte hi kan hloh a thiang lova, Kristian kan nihnna dal lovin nasa zawkin kan chawi nung deuh deuh tur a ni," a ti.

Kut hmanaah hian Hlukhla Kut Thlengtu, Lawngtlai DC J Hmingthanmawia leh Chapchar Kut Thlengtu, LADC CEM VL Hmuaka te pawhin thu an sawi.

Hnahthialah chuan Chapchar Kut hi Denglunga Pasalṭha Mualah hman a ni a, parliamentary secretary Hmingdailova Khiangte leh bialtu MLA John Siamkunga'n an hman pui.

Hmingdailova Khiangte chuan Chapchar Kut chu kut satliah mai a nih loh thu sawiin, "Khawvel-ah hian kut hi a tam hle a, mahni cultural item leh draditional tih lar leh chawilar thiamte hi ngaihsan an hlawh ṭhin," a ti.

John Siamkunga pawhin thu sawiin, "Lalnu Ropuiliani lalna tlang ngei a Chapchar Kut kan hmang thei hi a ropui hle a ni," a ti a, hlim taka kut hmang turin mipuite a chah.