Larsapin Nirbhay Sharma-in Chapchar Kut chibai Mizote a buk

Governor Lt. Gen. Nirbhay Sharma chuan Chapchar Kut pualin nimin khan thuchah a ti chhuak a, Mizoram leh hmun danga Zofate zawng zawng kut lawmpuina chibai a buk.

Larsap chuan, "Chapchar Kut hi Mizo hnam inpumkhatna atan leh India ram pumpui inpumkhat nan thinlung hlan thar leh turin kut neitu, Mizo mipui te ka sawm a che u. Chapchar Kut hi Mizoten hun rei tak ata tawh hlim leh lawm taka hman ṭhin a ni tih ṭhangtharten hre thar leh se ka duh a ni," a ti a, ramchhung a lo ralmuan zawk nan theihtawp chhuah zel turin Mizo mipuite a sawm.

Chapchar Kut hi Mizote tan a hlu tih sawiin Governor chuan, "Ṭhangtharte pawhin kut phena Mizo nunmawi inzirtirna pawimawh tak takte hi hriat tum ula, kut in a ken tel boruak ṭha, inremna leh hnam inpumkhatna phei hi chu theihnghilh hauh lo turin ka duh a che u," a ti a, hna pawimawh tak a neih lawk avanga kut lawmnaa a telve hman lo chu pawi a tih thu a sawi.

Larsap chuan Chapchar Kut chu hnamzia pholanna hun atana remchang tak a ni tih sawiin, "Chapchar Kut kan hman leh hunah phei chuan tun aia tam kan kut chhim tur hian hnamdang te sawm ila a hlawk thlak hle in ka ring. Midang ruala hmasawn zel kan duh si chuan kan hnamzia leh rohlu te vawngnung tlat tho siin kan in hawn zau telh telh erawh a ngai thung tih i hre thar leh ang u," a ti.