Lily Veng mi 70 endik tawh
Chaltlang Lily Veng pa, Covid-19 frontline worker (police) pakhatin hripui a vei tih hmuh a nih hnua mi dang pariatin an kai tih hmuh chhuah a nih hnuah mi 70-te swab sample endik a ni tawh a, mi 36 result hriat a ni tawh. Nimin khan mi 21-te swab sample lak leh a ni bawk.
Chaltlang Lily Veng Local Task Force secretary Lalfakawma'n Vanglaini palai a hrilh danin, August 13, Ningania ZMC-a swab sample endik result hriat tawh mi 36 zinga Covid-19 vei hmuh chhuah thar hmeichhe naupang kum 6 mi chu a hmaa hripui vei hmuh chhuahte ṭhenawma mi a ni a; mi dang 35-te erawh chu an fihlim rih thung.
Lily Veng lam mi 36-te result chhuak tawh bakah hian nimin khan mi 34-te sample endik leh a ni a, he thu ziah lai hian result hriat hman a ni lo. Contact tracing an kalpui mek zel a, chu'ng aṭanga endik ngai nia hriat mi 21-te pawh nimin tlai aṭang khan an swab sample lak niin, vawiin lamah ZMC laboratory-ah endik theih beisei a ni.
Lalfakawma chuan, an venga Covid-19 vei an awm chungchangah leh an bawhzuinaah sorkar official-te nen ṭha taka an thawhho thu Vanglaini palai a hrilh a; sorkar lamin an ngaihsaknaah an lawm tak zet tih a sawi bawk.