LC/VC-ah party dangin min huphurh Ruling thawhpui a hlâwk ber- MNF

MNF party hruaitute chuan nimin khan Aizawl Press Club-ah thuthar thehdarhtute an kâwm a; village council (VC) leh local council (LC) inthlanah party dangte'n MNF chu an huphurh thu leh ruling thawhpui a hlâwk ber tih chu tlang hriat a nih thu an sawi.

MNF vice president Lalthlengliana chuan, VC/LC inthlan puan a nihin ZPM President-in chawpchilh taka inthlan buatsaihah sorkar a puh tih sawiin, "Hun eng emaw chen VC/LC term pawhsei a ni. Kan inthlang thei dawn em tih ngaihtuahin sorkar chuan sorkar laipui hotute an zuk ráwn a ni. Anni chuan social distancing bawhchhe loin, ni khata in thlang zo lo a nih pawhin ni hnih pawh hmang mai ula, inthlan hun chu nangmahni tih dan dan ni rawh se, an ti. Tichuan SEC kuta awm a nih angin fel takin rua­hmanna an siam a ni," a ti.

Lok Sabha MP inthlan zawhah ZPM President-in, 'Kan tihsual lian ber chu Congress nen kan thawkho kha a ni. Tun hnuah Mizoram pum huap inthlanah party dang kan thawhpui tawh lo ang,' a ti nia sawiin Lalthlengliana chuan, "ZPM Secretary General pawhin, 'Kum 2020 VC/LC inthlanah ZPM kan mal din dawn' tiin press release a chhuah. Mahse, tun VC inthlan dawnah Congress nen khaw 35-ah an thawkho leh si," a ti a, ZPM chu BJP pawh thawhpui hreh loah a puh.

Lalthlengliana chuan, Covid-19 vangin khawvel a buai tih sawiin, "Mizoram pawhin nasa takin kan buaipui a, Chief Minister-in theihtawp chhuaha hma a lak avangin mipuiin min fak a, political party dang hotu Pu Hawla pawhin sorkar ṭawiawm a ṭul thu sawiin, 'Mipuite'n sorkar thu i awih ang u' a ti hial. Chutih lai chuan, tu thu nge rin tur tih hriat a har a, thianghlim leh fel bera an ngai nge ni MPCC treasurer Pu Zodin­tluanga chuan sawisel loh a ram pawh a nei lo," a ti.

MNF Vice President sawi danin, Zodintluanga'n tun hnaiah Lungleia task force ho tan DC kaltlangin ambulance a pe a, motor lei nan MLA fund aṭanga sum a lâk chhuah RTI Act hmangin dil chhuah a ni a, cheng nuai 19.2 chuang séngin ambulance a lei niin an hria. Task force hnena ambulance a pek chu cheng nuai 7 hû bak a ni lo a, sum a hmanna dang hriat a ni lo.

Hun kal tawh thlirin, ruling party thawhpui a hlâwk ber tih chu tláng hriat a nih thu sawiin MNF hruaitute chuan, "Tuna MNF sorkar hi kum thum leh a chanve a la ding dawn a, khaw tin leh veng tinte ruling VC/LC siam turin ka ngen a ni," an ti a; khaw 10 - Lènchím, Sethlun, Chhippui, Ruantlang Mualveng, West Phuldungsei, Serhmun, Hruiduk, New Kawnpui, Hnahthial South-III leh New Hruaikawnahte MNF VC candidate-te'n chuhpuitu an nei lo tih an sawi.