KHAWTHLIR

Vawiin August 15 hi India zalenna ní, Independence Day vawi 74-na a ni a, Aizawl, district headquarters tinah leh SDO(C) leh BDO ṭhuthmun khuaahte lawm a ni dawn. Aizawlah chuan zing dar 8-ah Lammualah ṭan tur a ni a, chief minister Zoramthanga khuallian a ni ang. District dangah pawh minister-te'n an hmanpui dawn. Kumina I-Day lawmnaah hian Covid-19 léng vangin parade a awm dawn lo a, sorkar mi pawimawhte chauh telin, mipui an tel lo ang.

State Election Commission (SEC) chuan August 27, 2020-a village council leh local council inthlan turah campaign chungchanga khuah­khirhna a tichhuak. In tina luta campaign (house to house campaign) tih theih a ni a, candidate leh a zuitu mi dang pahnih aia tam loa tih tur a nih thu a tarlang a, "Mimal compound leh in chhunga luh erawh chu in neitute thu a ni," a ti.

KṬP, Ramhlun Branch chuan nimin khan Synod Hospital blood bank-ah thisen unit 35 an pe a, petute mipa 32 leh hmeichhia pathum an ni. Evangelical Church of Maraland (ECM) Krizyhpa Thyutlia Py (Kristian Ṭhalai Pawl) New Siaha Branch pawhin nimin khan Siaha District Hospital tan thisen unit 17 an pe a, a petute mipa 16 leh hmeichhia pakhat an ni.

Siaha DC Kumar Abhishek chuan thupek chhuahin, an district chhungah ṭhenawm state leh ram dang aṭanga bawng, vawk leh vawk sa aṭanga ei tur siam reng reng lak luh leh thawn chhuah a khap. Thupek hian thla hnih chhung a huam dawn a, sorkar aṭanga phalna neite erawh a huam lo.

Nimin khan State Referral Hospital-ah Covid-19 vei hmuh chhuah thar pahnih dah luh a ni a, Covid Care Centre (CCC), Thenzawl aṭangin Covid-19 vei pakhat sawn luh a ni bawk. SRH-ah hian hripui vei mi 58 an awm mek a, ICU-ah pakhat, SICU-ah pathum leh Isolation Ward-ah 54 an awm. SRH-ZMC Bulletin tarlan danin, ICU-a awmin ṭhat lam a pan zel.

Mizoram Lokayukta office chu Bungkawn, Aizawl aṭangin F Kapsanga building, Temple Square-ah tun hnai khan an insawn.