India rama Covid-19 donaah Mizoram hi A thawk ṭha ber kan ni - Health Minister

Health minister Dr R Lal­thangliana chuan August 13, Ningani khan Siahaa damdawi-in leh Health department hmunhma dangte a tlawh a; Covid-19 donaah Mizoram chu India rama thawk ṭha ber state a nih thu a sawi a; chutih rualin, tun ang zel a nih chuan, kumin December thlaah chuan 5,000 chuang pawh an tlin theih thu a sawi bawk.

Minister hian Siahaa Nursing School, medical superintendent office sak mek, staff quarters sak mek leh district hospital building tharte a tlawh a; chief medical officer Dr C Hnichho, medical superintendet Dr C Lal­rosanga leh thawktu dangte'n an lo dawngsawng.

Dr R Lalthangliana chuan, "Covid-19 dona kawngah Mizoram state chu India rama thawk ṭha ber kan ni," tiin, Mizoram sorkar hmalak dan chu sorkar laipui hotute pawhin an zawt ṭhin niin a sawi a; "Pathian ṭanpuina leh Mizoram mipuite'n Covid-19 dona kawnga kan inlungrualna leh thawhhona ṭhat vang a ni," a ti a, Siaha district-a hripui dona kawnga an hnathawh chu ropui a tih thu a sawi.

Health Minister chuan, Mizoram sorkarin medical department-a thawktu indaih lohna a ngai pawimawh nia sawiin, "Indaih loh zualna phuhruk turin IV grade aṭanga medical officert thlenga huamin staff 734 lak tum a ni a, Covid-19 boruak vangin staff lak hna kan la kalpui theih rih lo a ni," a ti.

Mizorama Covid-19 vei zat chu 600 a chuang tawh tih sawiin R Lalthangliana chuan, "Central lama mithiamte chuan tun ang rate-a kan kal chuan December thlaah chuan 5,000 chuang pawh kan ni thut thei a ni, an ti. Chuvangin, sorkarin Covid-19 laka kan him nana inkaihruaina a duan­te zawm ṭhat hi mi tinte'n kan tihmâkmawh a ni," a ti a; mi tinte inthlahdah a thian loh thu a sawi.

Higher & Technical Education minister ni bawk Dr R Lalthangliana hian Ningani vêk khan Saiha college a tlawh bawk a; Covid-19 leng vangin college admission-ah harsatna a awm tih sawiin, "Mahni district-ah ṭheuh admission hi lak ni se kan ti a. Mark hniam leh sang pawh admit vek mai tur a ni. Zirtirtu indaih lohna avangin lumpsum pay teacher 100 tal lâk kan tum," a ti.

Minister hi Health secretary H Lalengmawia, Hospital & Medical Education director Dr T Lalhmangaihi leh hotu dangte'n an ṭawiawm a ni.