Chhiatni ṭhatnia sorkar thupek

State Disaster Management Autho­rity (SDMA) hnuaia State Executive Committee chairman Lalnunmawia Chuaungo, chief secretary chuan August 13, Ningani khan chhiatni ṭhatnia puipunna hmunahte zawm tur a tichhuak.

Sorkar thuchhuah chuan, Covid-19 hripui léng mekah Mizoramah vei hmuh chhuah thar an pung zeI a, mipui punkhawmna chhiatni/ṭhatni - mitthi vuina, lungphunna, inneihna, etc. hi hri inkaidarhna hmunah a chang ang tih a hlauhthawnawm hle niin a tarlang a, "Sorkarin Order No.B .13021/101/2020-DMR/Pt-III dated 31.07.2020 a tih­chhuahah heng hmunahte hian mi 50 aia tam punkhawm a khap a, amah­erawhchu, hei hian zawm a hlawh lo hle niin a lang," a ti.

Sorkar thuchhuak tarlan danin, Covid-19 léng mek laka mipui an him zel theih nan SDMA Chairman (Chief Minister) kaihhruaia August 12, 2020-a sorkar hotute leh páwl aiawhte ṭhukhawm chuan chhiatni ṭhatnia punkhawm chungchangah khauh taka inkhuahkhirhna kenkawh ṭha an ti a ni.

1.    Chhiatni ṭhatniah Order No.B .13021/101/2020-DMR/Pt-III dated 31.07.2020-in a tarlan angin, mi 50 aia tam punkhawm khap tlat a ni. Chhungkhat laina pawh a tlem thei ang ber kal ṭhin ni se, association/pawl anga mitthi vuinaah mi pahnih aia tam kal loh tur a ni.

2.    Mitthi vuinaah social distancing a awm theih nan kohhran hall emaw, YMA hall emaw, veng chhunga hall zau tâwk tak, hmun remchangah vuina hun hman tur a ni. Hemi atan hian mitthi lawina kohhran leh a veng neitu YMA-te'n ruahmanna an siam ṭhin ang.

3.    Hall luhka zawng zawngah a lutte hming pum, address leh telephone number chhinchhiah tur a ni a, LTF/VTF-te'n ruahmanna an siam ang. Mi 50 aia tam chu luhtir loh tur a ni.

4.    Chhiatni ṭhatni puipunna hmunah reng reng zai/zaikhawm loh tur a ni.

5.    Mitthi vuitu tur chu a theih hram chuan kum lama la upa lo leh mi hrisel pangngai a ni tur a ni.

6.    Mitthi vuinaah hian kum lama upate leh hrisel lohna benvawn neite kal loh tur a ni.

7.    Chhiatni ṭhatniah mipui kalkawmten mask an vuah vek tur a ni.

8.    Mitthi vuina, lungphun, inneihna, anniversary, pawl thila kalkhawmna, adt.-ah attendance register vawn ṭheuh tur.

9.    Mitthi vuinaah thingpui leh a hmeh sem loh tur a ni.