Hmeichhiate chawikanna tur zirho

DRDA, Serchhip leh Khawlailung MHIP Branch ṭangkawp chuan nimin khan Khawlailung community centre-ah CSR 'Workshop on Women Empowerment' an buatsaih a, Serchhip DC Dr. Lalrozama'n a hman pui.

Dr. Lalrozama chuan hmeichhiate, a bik takin nute pawimawzia chu hawvel pumah hriat tlan vek a nih thu sawiin, "Hmeichhiaten an chhia leh ṭha hriatna fim taka an hman theihna leh zah an hlawhna apiang ram changkang leh khawtlang changkang an ni," a ti a, hmeichhiate chu an mawhphurhna a pawimawhzia hre turin a chah.

Serchhip district chu India ram puma ziak leh chhiar tamna ber district an nih laiin nu nau chunga thi (MMR) leh nausen thi (IMR) ah erawh an dinhmun a chhuan awm lo tih sawiin Serchhip DC chuan, "Hriselna leh nunphungah pawh ziak leh chhiar thiam tamna district nen a in mawi tura kawng hrang hranga ṭan lak a ngai hle," a ti.

Workshop hi hun thumah ṭhen niin, hun khatnaah 'Dan hnuaia dikna chanvo chi hrang hrang' tih zirho a ni a, chhawng hnihah 'Hmeichhiate leh hriselna' tih zirho niin, chhawng thumnaah 'Hmeichhiate leh zirna' tih zirho a ni.