Aieng leh dragon fruit-a hmalak rêl

Kolasib District Level Monitoring Committee for Central Sector Scheme chu nimin khan an chairman Dr H Lalthlangliana, bawrhsap hoin DC conference hall-ah an ṭhu a; an district-ah Farmers Producer Organisation (FPO) kaltlangin aieng leh dragon fruit-ah nasa zawka hmalak an rél.

Dr H Lalthlangliana chuan, sorkar laipui ruahmannaa an district-a FPO din tura hmalakna a awm tur chu phûrawm a tih thu sawiin, "Thawhhona ṭha nen chuan loneitute tan hlawhtlinna a awm ngei ka beisei. Hlawhtling taka kalpui a nih chuan thlai thlan bik hmanga Kolasib district tana hming chher theihna hmanraw ṭangkai tak a ni ang," a ti.

Meeting-ah hian, Kolasib district-a kuthnathawktu intél khawm FPO din dan tur leh hlâwk leh mumal zawka an kal theih nana hmalakna tur sawiho a ni. Scheme hi kum 2020-2024 chhung kalpui tur a ni a, ram pumah FPO 10,000 din tum a ni. FPO pakhat tan kum thum chhungin cheng nuai 18 ruahman a ni a, FPO tinah hian member 100 tal an awm a ngai thung.