Mizoramah sorkar kum thar aṭangin Change a thleng dawn: Finance Minister

Federation of Mizoram Government Employees & Workers (FMGEW) chuan nimin khan Vanapa Hall-ah General Conference an hmang a; khuallian, Finance minister Lalsawta chuan, sorkar kum thar aṭangin Mizoramah inthlak danglamna (change) nasa tak a thlen tur thu a sawi.

FMGEW inkhawmpui hi an senior vice president K Lalsawmvela'n a kaihruai a; Lalsawta chuan, Planning Commission ṭhiah a nih hnuah state-te'n pawisa an hmuh dan a danglam thu sawiin, "State-te mawhphurhna a sang hle. Kan patlin leh tlin loh azirin kan ding chhuakin kan ding chhuak lo ang. Funding kalphung thar hmang thiam leh thiam lote an intlân pel zel ang," a ti.

Lalsawta chuan, sum hmuhte hman dan tur uluk taka ngaihtuah a ṭul tih sawiin, ṭha tak sum hman a nih theihna atan uluk taka an ngaihtuahnate sêng turin sorkar hnathawkte a sáwm a ni.

Finance Minister chuan, sorkar kum kal mek chu sum hmuh dan kalphung thar hman ṭan kum ni mah se, sorkar laipuiin CSS hnuaia sum a pek dan leh thil dangah tihdanglamte a neih leh avangin kalphung a mumal lawk lo tih sawiin, "Kumin aṭangin change nasa tak a thleng dawn. Kal dan pangngai ringawtin kan kal thei lo," a ti a; mamawh záwng uar a, mamawh lohte titlem zawnga kal a ṭul thu a sawi.

Mizoram sum leh pai dinhmun a ziaawm hret hret tih sawiin Lalsawta chuan, "Kan insangmar zel chuan kum 2018 aṭang chuan nuam ve deuhin kan awm theih ka ring. K-Deposit-a sum dah pawh a tlahniam tial tial a, kum 2018-ah chuan K-Deposit hi lam pawh a ngaih tawh loh ka ring," a ti.

Finance Minister sawi danin, Mizoram sorkarin economic measure atan ṭan a la zel dawn a, sum lak luhna tura rawtna lutte pawh bawhzui zel a ni. Medical reimbursement a felfai zawk theihna atana Chief Secretary hoa ruahmanna siam chu thehluh a ni tawh a, chu chu mithiamte'n an zir chiang leh mek a ni.

FMGEW president R Lalrammawia pawhin thu sawiin, sorkar hnathawkte'n beih an tawk nasa niin a sawi a, "Political leh NGO platform aṭangin beih kan tâwk nasa hle. Sorkar hnathawk chu eiruk ching ang ringawta sawite kan ni ṭhin. Eng nge kan thawh tih kan sawi ve tawh a, kan hnathawh ngaihtuah loin mi kâp pawp pawp a, mipuite tana thawk kan ni tih hi kan put darh a hun," a ti.

R Lalrammawia chuan, nu leh pa chan chang tura ngaih sorkar hotute'n an vau ṭhin nia sawiin, "Mihring ve tho kan nih avangin kan rilru a na ve ṭhin hle," a ti a; invau leh insawiselin ṭhahnemngaihna a tihniam ve thei tih hriat a pawimawh thu a sawi.

Khawmpuiah hian chawhnu lamah ro an rel bakah, MJA kaihhruaina hnuaiah hruaitu thar tur mi 10 an thlang chhuak a, nihna an siam rem ang.

FMGE&W rorel Ṭhenkhat

ϖ Department/office eng emawzatin mahni office tur hmun kan neih loh laiin, sorkar hmun/ramte mimal, pawl, kohhran, veng bil leh VC/LC hnena sorkar ram pek hi tihtawp ni rawh se.

ϖ Mizoram sorkar hnuaia thawk officer-te MR dawng thei chin hi en ṭhat ni rawh se.

ϖ Sorkar laipuiin 7th ROP a hman velah Mizoram sorkar pawhin a hnuaia thawkte hman tir ve rawh se.

ϖ Mizoram sorkar hnuaia hna hrang hrang (Group A, B, C, D) hi inkhairual leh awmze nei zawka lak ṭhin ni tawh rawh se.