Khawlaia zu in khap thu puan thar a ni

Mizoram police chuan thuchhuah siamin, Mizoram Liquor (Prohibition and Control) Act, 2014 (MLPC Act) Section 42 (3) hnuaiah khawlaia zu in khap tlat a nih thu an tarlang.

Police thuchhuah chuan, "MLPC Act hman a nih tâk avanga zu in leh rui khuahkhirhna awm lo ang maia ngai a, mipui vantlang mit tikham khawpa che an awm fo niin a lang. Dan hriat fiah tâwk loh vanga buaina tawh loh nan leh khawlaite mipui vantlang tana a thianghlim zawk nan Aizawl khaw chhungah police-te'n hma thar kan lak dawn avangin, mi tinin dan kan hriatfiah lehzual nan kan inhriattir nawn a ni," an ti.

Police thuchhuah tarlan danin, MLPC Act Section 42(3) hnuaiah khawlaia zu in khap a ni a; khawlaia zu rûi chunga buaina siam leh hnawksak taka awmte chu Mizoram Police Act 2011 Section 140(b) leh MLPC Act 2014 Section 42(4) hmanga khap leh hrem theih a ni.

Police thuchhuah chuan, "Khawlaia langsar taka zu in leh intihbuai mai hreh lo tam tak avangin mipui vantlang tana hmuh nuam lo leh harsatna thleng thei venna tur leh, ualau taka zu in leh ruih chingte'n an sim theih nan Aizawlah hetiang tih chíngte vâi turin police-te'n hma kan la dawn," an ti a; khawlai leh kawtthlerte a him zawk nan police hmalakna thlawpa pui turin mipui an ngen.