International Women's Day hmang

Nimin, March 8 kha International Women's Day a ni. He ni pual hian Social Welfare department direc-torate conference hall-ah hun hman a ni a, Social Welfare minister PC Lalthanliana'n a hmanpui. District dang ṭhenkhatah hman a ni bawk.

Minister PC Lalthanliana chuan, mipa hlawhtlingte hlawh-tlinna phêna mi pawimawh tak chu hmeichhia an nih thu sawiin, "Tumahin hmeichhiate hi endawngin hmusit lo se, hmeichhia tumah inkiltawihin, indah hniam hek suh se," a ti a; Mizoram sorkarin hmeichhiate dinhmun chawisanna tan village council leh municipal-ah quota a siam thu a sawi.

International Womens Day thupui atan 'Intluktlânna khawvel - kum 2030-ah: Hmeichhia leh mipa intluktlân nan pên khat dang leh' tih hman a ni tih sawiin PC Lalthanliana chuan, "Kum 2030-ah chuan mipa leh hmeichhia inthliar hranna awm tawh loa intluk tlang deuha kal tawh turin sorkarin theihtawp a chhuah mek a ni," a ti.

MHIP vice president Dr Than-puii pawhin thu sawiin, domestic incidence report (DIR) 45 Court-a thehluh a nih tawh thu a sawi a; maintenance claim thubuai 55, pawngsual thubuai pariat, domestic violence thubuai 130 thehluh a nih tawh thu leh, police station-a women cell-ah thubuai 73 thehluh a nih tawh thu a sawi bawk.

Inkhawm hi Social Welfare joint secretary K Vanlalrawni’n a kaihruaia a, assistant director Chuauzikpuii’n thupui a sawi.

Mamitah pawh District Legal Services Authority buatsaihin International Womens Day pualin Chhimveng YMA Hall-ah hun hman a ni a, Mamit DC Lal-biaksangi'n a hmanpui.

Inkhawm hi MDLSA member secretary Julie Lalrinzami'n kaihruai a; Mamit khawpuia MHIP branch paruka member-te telin, hmeichhe chungchanga dan hrang hrangte an inhrilhfiah bakah, inelnate an nei a ni. Chawhnu lamah inentirna hun buatsaih a ni.