KHAWTHLIR

IAS coaching

Mizoram Youth Commission (MYC)-in Aizawla IAS coaching a buatsaih chu vawiinah ṭan a ni dawn. IAS coaching hi zing dar 7 leh chawhnu dar 2 inkarah neih tur a ni a; SSC coaching erawh chu March 21, 2016-ah ṭan tum a ni.

Website hawng

Raj Bhavan website siamṭhat rajbhavan.mizoram.gov.in chu nimin khan governor lt. gen. Nirbhay Sharma in a hawng. Larsap chuan Raj Bhavan website chu information technology huang chhunga hmasawn mek Mizo ṭhalaite zawng zawng Raj Bhavan-in a chhuangin a thlawp tlat tih lan tirna atana siam a nih thu a sawi.

Ganja man

Excise & Narcotics department-a Anti-Narcotics Squad-te chuan, nimin chhun dar 12 khan Rangvamualah ganja kg. 5 leh gram 98 an man a, a neitua puh Bisno Rong (38) d/o Tluanga (L), Naisingpara, Tripura nia inchhál an man bawk.

Kolasib sports

Kolasib District Sports Committee (KDSC)-in Diakkawn khelmuala District Sports Meet an buatsaih chu, nimin khan parliamentary secretary (Sports) Hmingdailova Khiangte-in a hawng. Sports Meet-ah hian infiamna chi hrang paruk - football, volleyball, table tennis, wrestling, athletics leh inhruipawhte hmangin an inel dawn a ni.

PMEGP Exhibition

KVIC bultumin nimin khan Saikuti Hall, Lungleiah ‘State Level PMEGP Exhibition’ huaihawt a ni a, Lunglei DC Abhijit Vijay Chaudhari-in a hawng. Exhibition hian March 15 thleng a awh dawn a, dawr 40 vel hawn theih beisei a ni.

Medical Camp

1st Assam Rifles, Lungleia doctor-te chuan nimin khan MTP Hall, Tuipang V-ah Free Medical Camp an buatsaih a, naupang leh puitling 100 chuang an inentir a, a thlawnin damdawi ṭhenkhat sem a ni.