Smart City Mission zirchianna buatsaih Mipui himna ngaihtuah a ngai: Larsap

UDPA department leh Former Legislators Association of Mizoram (FLAM) ṭangkawp chuan, nimin khan Assembly Annexe conference hall-ah Smart City Mission zirchianna an buatsaih.

Khuallian, Governor Lt.Gen. Nirbhay Sharma chuan, Smart City kalpuinaah mipuite himna ngaihtuah hmasak pawimawh a tih thu a sawi.

Larsap chuan, Smart City Mis-sion atana khawpui dangte inpuahchah dan anga Aizawl khawpui cheibâwl chu a fuh ber loh theih thu a sawi a, "Aizawl khawpuiin a mamawh pawimawh zualte hriat chian hmasak a ṭha. Chenna in bit lutuk, kawngpui tâwt leh bawlhhlawh paih dan awmze nei tâwk lote tihziaawm bakah, thla riat chhunga ruahtui tla luangral ṭhin khawl ṭhat theih hi mamawh hmasa niin ka hria," a ti.

Governor chuan, Aizawl khaw-pui hmasawnna turin a chhunga chêngte'n mi tam zawk ṭhatna an ngaih pawimawh a, an ram leh in hmunte thlenga chân ṭhente pawh an inhuam tel a ngai tih a sawi a; "Smart City hi chhungkaw bil ṭheuh aṭanga a inṭan hmasak a pawimawh," tiin, khua leh tuite'n khawtlang hmasawnna tura an tih tur an chian ṭul thu a sawi.

Nirbhay Sharma chuan, Nepal, Sikkim leh Manipur-a chhiat-na thlengin Aizawl khawpuia chengte tiharh thar se a duh thu a sawi a, "Lirnghing kawngah hmun hlauhawm ber anga chhâl kan ni a. Han en mai chuan Aizawl khawpui hi a him lo a ni tih mi tinin kan hre thei ang. Smart City hmanga Aizawl khawpui cheibâwl ṭhat a ni tur hi ka lawm a, ka ngaih pawimawh ber chu mipui himna a ni," a ti.

Seminar hi FLAM president KL Rochama'n a kaihruai a; UDPA director Zorammuana'n Smart City Mission kalpui tum dan leh Aizawl khawpui cheibâwl ṭhat dan tura sorkarin ruahmanna a siamte a lem nen a hrilhfiah.

Aizawl Smart City concept paper-a tarlan dan chuan, Aizawl khawpui zau zawng chu sq.km. 152 a ni a; kum 2011 chhiarpui aṭanga chhûtin, km. 1 bial chhung-ah mihring 1,575 an chêng. Aizawl khawpuiah mi 2,93,416 an cheng a, chu'ng zinga 98.36% chuan ziak leh chhiar an thiam a ni.