Bawlhhlawh sâwngbâwl dan zirho

All India Council of Technical Institutions (AICTE) leh NEQIP bul-tumin, nimin khan Mizoram Polytechnic, Lungleiah 'Solid Waste Management & Safe Drinking Water’ tih thupui zirhona buatsaih a ni a; Lunglei DC Abhijit Vijay Chaudhari-a'n a hawng.

Abhijit Chaudhari chuan, bawlh-hlawh sâwngbâwl chu khawvel pumah buaipui tham a tling tawh tih sawiin, "India sorkar pawhin ram chhung fai leh thianghlim siam a ngai pawimawh a, Swacch Bharat Campaign a ṭan a ni. Vawiina solid waste management chungchang zirho a, Mizoram bik atan bawlhhlawh sawngbawl dante ngaih-tuahho a ni hi a lawmawm hle," a ti.

Bawlhhlawh sawngbawl dan hrang hrang zingah khawpui páwn deuh emaw hmun awl lai emawa bawlhhlawh paih ngawt ṭhin chu a ṭha lo tih sawiin, Lunglei DC chuan, "Environment, thing leh mau leh luite a tihchhiat bakah, mihring hriselna tan pawh a pawi thei a ni," a ti a; bawlhhlawh sawngbawl dan ṭha ber chu thil hman hnu hman nawn (recycling) leh thil hman hnu ṭangkai taka thil dang tih nana hman a nih thu a sawi.

PHE superintending engineer H Duhkima tarlan danin, Mizoramah ni khata tui mamawh zat chu litre nuai 617 a ni a, tui pek theih zat chu litre nuai 492 a ni. Kum tin May-September thla inkarah fûr ruahtui tam mah se, dahṭhat leh sawngbawlah harsatna an la awm a ni.

Seminar-ah hian Mizoram University leh college hrang hrang bakah, National Institute of Technical Teachers’ Training Research (NITTR), Kolkata, Hojai College, Assam leh Patna Polytechnic aṭangin mi eng emawzat an tel a ni.