Inpekna nena thawk turin sáwm

School Education minister Lalchhandama Ralte chuan nimin khan Mamita zirna hmunhma hrang hrang a tlawh a, thawktute chu inpekna tak tak nena thawk turin a sáwm.

Lalchhandama Ralte chuan, Mamit district chu ngaihsak ngai bik Aspirational District a nih avangin, zirna lama thawktute tan ṭan lak nasat a ngai tih sawiin, "Zirna tel loin hmasawnna a kal thei lo a, hmasawnna kim nei turin zirnaah harh thar a ngai. Sorkarin zirna a ngai pawimawh a, tun hnaiah thawktu mi 1,100 vel lak an ni tawh. High school tan zirtirtu 157 lak phalna pawh hmuh a ni tawh a, Covid-19 vangin sorkarin a la thei rih lo a ni," a ti.

Mamit leh Aizawl inkalpawhna kawngpui a ṭhat chho zel thu leh Mamit chu sorkar hnathawk tan Aizawl tih lohah chuan post ṭha a nih ṭan thu a sawi bawk. Bialtu MLA H Lalzirliana pawhin thu sawiin, Aspirational District an nih chhan, zirna leh hriselna lamah theihtawpa ṭan lak a ṭul thu a sawi. School Education Minister hian DIET, DEO office building sak mek, SDEO builing sak thar leh higher secondary school-te a tlawh a ni.