Tlawng lui hnár lama leivûng paihtute hrem turin sorkar phût

Mizoram Pradesh Youth Congress Committee (MPYCC) chuan thuchhuah siamin, Aizawl khawpui châwm­tu Tlawng lui tui thlitfim hleih theih loh khawpa tibawlhhlawhtu leivûng leh bawlhhlawh paihtute lakah na taka 'action' la turin Mizoram sorkar an phût tih an tarlang.

MPYCC chuan, Mission Vengthlang leh Reiek kái inkar kawngpui hmun hrang hrangah leivûng leh bawlhhlawh paih ṭhin a ni a, chu chu Sakhisih luiah luang lutin, Zawngkawtah a thleng thla a, a thlang lawka Aizawl khawpui tui lakna hnár Serlui a fin tih sawiin, "Mi ṭhenkhatin leivûng leh bawlhhlawh an paih nasat avangin Aizawl khawpui tui tlan hnár a bawlhhlawh phah hle a, leivûng leh bawlhhlawh paih khap mah se, ti lui an awm zel avangin nasa leh zuala ven a ngai a ni," an ti.

Congress ṭhalai chuan, Tlawng kawng­ah Aizawl Municipal Corporation (AMC)-in mi eng emaw zat hnena leivûng paih phalna a pek tawh chu sût (cancel) a nih tawh thu leh tun hnaiah police-te'n a hmunah an endik a, a paihtute an vau (war­ning) tawh thu an sawi a; chuti chung chuan Tlawng lui tihbawlhhlawh hreh lo an la awm cheu avangin Mizoram sorkar chu chak zawkin hma la turin an phut a ni.