AR-in Cycle Expedition Rally buatsaih

Assam Rifles chuan an din champha phak vawi 182-na lawmna atan, nimin khan ‘Cycle Expedition Rally’ an buatsaih a; Khatlaa 23 Sector Assam Rifles headquarters aṭangin Governor Lt.Gen. Nirbhay Sharma-in a vai liam.

Governor chuan, Assam Rifles-te chu indopui hun lai aṭang tawhin hmarchhak bial mai ni lo, Jammu & Kashmir-ahte pawh ram tan an thawk tawh ṭhin an nih tih sawiin, tun ṭuma 'Remna leh muanna, inunauna leh faina' puala Cycle Expedition Rally an buatsaih chu fakawm a tih thu a sawi.

Larsap chuan, rally-a tel tur sipaite chu fuihin, state hrang hrang an paltlang dawn tih a sawi a, an paltlangte nunphung leh hmasawnnate zir tel zel turin a chah.

39 Assam Riffles aṭanga Cycle Expedition Rally-a telte hi Capt. Tushar Mehlawat-a’n a ho a, an vaiin 10 an ni. Rally-a kalte hian an tum dan chuan Silchar, Halflong, Moibang, Lumding, Naogaon, Guwahati paltlangin, March 20-ah Shillong an lut ang. March 24-a Assam Rifles din champha lawmna pui ber, Assam Rifles Director General-in Laitkor, Shillong-a a buatsaih turah an tel dawn a ni.

Hmarchhak state hrang hranga AR-te chuan March 24-a an din champha lawmna nang hman tur hian Cycle Expedition Rally an buatsaih a, Shillong an pan khawm dawn a ni.