UDPA minister leh Larsap inkawm Aizawl hmasawnna tur sawi dun

Governor Lt.Gen. Nirbhay Sharma leh UDPA minister Zodintluanga te chu nimin khan Raj Bhavan-ah an inkâwm a; Smart City project chungchang leh Aizawl hmasawnna tur hrang hrangte an sawi dun. Zodintluanga chuan project-a sum hmuh turte pek chhuah thuai a nih theih nana ṭan lâk-pui turin Larsap a ngen.

Governor chuan, Raj Bhavan chu Smart Raj Bhavan a nih theih nan Aizawl Smart City project-ah telhsak ve turin Minister a ngen a; Minister chuan Smart City project-ah Raj Bhavan telh a nih ve theih nan theihtawp chhuah tiamin, remchang hmasaah UDPA officer leh technical mite'n Governor office beráwnin Smart Raj Bhavan Concept an siam tur thu a sawi.

Nirbhay Sharma chuan, Ai-zawl chu hill station nuam tak a nih avangin khawpui nuam taka siam theih nia a hriat thu sawiin, a hranpaa special attention pek tlak hial a nih thu leh sorkar laipuia thlen ṭha a tih thu a sawi a, "Aizawl khawpui hi khawpui dangte ang bawkin urban culture ṭha tak nei thei a ni a, ṭhalaite tana intihhlimna turte leh mipui náwlpuiin hriselna lama hma an sawn theih nan gymnasium ṭha-hnem tak a awm a ṭul a ni," a ti.

Zodintluanga chuan, Mizo-ram sorkarin Ministry of Do-NER-a project a thehluh tam tak chu pawm a nih hnuah pawh sum pe chhuak mai loin, DoNER-in zawhna tam tak a siam a, zawhna chhân chhungin hun leh kum tam tak a liam hman ṭhin thu a sawi a, "Project sanction a nih meuh chuan project cost over-run leh time over-run a awm ṭhin a, project zawh hleih theih a ni lo fo," a ti.

UDPA Minister chuan, sorkar laipui aṭanga Mizoramin project hrang hrang a neihte chu sum pek chhuah a nih theih nan hun rei tak tak buaipui a ngaih ṭhin thu leh chuvang chuan duh anga hna thawh chak theih a nih loh ṭhin thu a sawi a; Larsap chu ṭan lakpui turin a ngen a ni.

Inkawmnaah hian, Aizawl Master Plan zûlzuia Aizawl khawpui zauh hna kalpui a ṭul thu te, Sairangah rél luhtir tum a nih avangin Sairang khua chu town planning mumal tak neih a ṭul thute an sawi. Zodintluanga chuan, Mizoramin ṭhalaite hmakhua ngaitu Governor a nei chu lawmawm a tih thu sawiin, ṭhalaite tana hmalakpui zel turin a ngen bawk.

Governor leh UDPA Mi-nis-ter inkawmnaah hian minis-ter hi UDPA secretary Dr C Van-lalramsanga leh joint secretary Van-lalmawia ten an ṭawiawm a ni.