MLPC Act khauh zawka kenkawh a ni - Excise & Narcotics dept.

Excise & Narcotics department (END) chuan thuchhuah siamin, MLPC Act, 2014 chu END-in khauh zawkin a kengkawh mek niin a tarlang a; mipui punkhawmna hmunah zu in phal a nih loh thu an puang.

END thuchhuah chuan, MLPC Act 2014 Section 42-ah angin, phalna neia zu inte pawh khuahkhirh an nih thu a tarlang. An tarlan danin, MLPC Act Section 42(3) angin mipui punkhawmna hmunah tumahin zu an in tur a ni lo a; Section 42(4)-in zu in chunga mi dang tana harsatna siam a khap a; Section 42(4)-in zu in chunga lirthei khalh a khap bawk.

Dan bawhchhiate chu MLPC Act, 2014 Section 43 hmangin hrem theih an ni a; dan bawhchhiate chu thiam loh chantir an nih chuan thla khat aia tlem lo, kum hnih thlenga tàntir emaw, Rs. 1,000 aia tlem lo, Rs. 5,000 thleng chawitír theih an ni.

Dan bawhchhiate chu tàntir emaw, pawisa chawitir emaw an nih loh pawhin, Excise & Narcotics officer kaihhruaina hnuaia vantlang hna thawk tura tih theih an ni bawk.

END chuan, MLPC Act bawhchhia, vantlang hmun hrang hrang ualau laia zu inte vâiin hma an la mek tih sawiin, "Dan bawhchhia mante chu thubuai siamsak zel an ni," an ti a; dan bawhchhe lo tura mi tinte an ngen rualin, dan lekkawh kawngah mipui ṭawiawmna an ngen a ni.