BCM Assembly ṭan a ni

Baptist Church of Mizoram rorelna sang ber, BCM Assembly vawi 120-na chu nizan khan BCM Hnahthial Bazar Kohhran biak-inah ṭan a ni a, vawiinah rorel inkhawm ṭan a ni ang.

BCM Assembly neihna tur biak-in chu Thawhlehni zan khan Organising Committee chairman Rev. Hrangaia Hmar, Hnahthial North bialtu pastor-in ṭawngṭaiin Pathian hnenah a hlan. Inkhawmpui thupui chu 'Ringtu nun' tih a ni.

Vawiin aṭanga Inrinni thlengin rorel inkhawm neih a ni dawn a, zan lamah vantlang Pathian biak inkhawm neih ṭhin a ni ang. Pathianni chawhma inkhawmah BCM president Rev. Lalthangliana Hnamte-in minister atan proba-tionary pastor pasarih a nemnghet dawn.

BCM Assembly-ah hian palai in report mi 820 an awm a, chung zingah chuan pastor 45 leh pro. pastor 19 an tel.

BCM report-a a lan danin, BCM Assembly hnuaiah Area Baptist Council 14 a awm a, pastor bial 80-ah tual-chhung kohhran 642, pastor thawk lai 137 leh pro. pastor 18, kohhran upa 2,972 leh BCM Mission hnuaia thawk 1,112 an awm.

BCM Assembly neihna Hnahthial Bazar Kohhran biak-in