National Food Security Act kalpui mekah Ration card tihdik loh a tam

National Food Security Act (NFSA) hman ṭan taka ration card pek chhuahah, chhungkaw hrang hrangte pian ni leh thla tihdik loh tam tak a awm. Food Civil Supplies & Consumer Affairs (FCSCA) Minister chuan, ration card dik lote chu siamṭhat a nih tur thu a sawi.

Thu dawn danin, Food Security hnuaia ration card siam tharah hian chhungkaw member-te pian ni leh thla a dik lo nasa a; January 1-a piang an tam hle. Pian ni leh thla bakah, pian kum dik lo leh hming dik lo a tam hle a ni.

Ration card-a pian ni leh thla dik lo chungchanga Vanglaini palai zawhna chhangin, FCSCA minister John Rotluangliana chuan, pian ni leh thla a dik loh chhan chu computer-in automatic-a a dah vang a nih thu a sawi a, "Form-ah pian ni leh thla dah a ni lo a, chuvang chuan computer-in automatic-in pian ni leh thla chu January 1-ah a dah a ni. Ration card dik lote chu siamṭhat tur a ni a, kan la ti-
ṭha leh vek ang," a ti.

Hetih lai hian, MNF chuan thuchhuah siamin, NFSA hnuaia ration card pek chhuahah, chhungkaw member-te pian ni leh thla a dik lo nasa lutuk chu a dik taka siam ṭha leh turin Mizoram sorkar an phût tih an tarlang a, "Khua/veng ṭhenkhata ration card sem chhuahte chu uluk lo taka siam a ni tih a lang. Chhungkaw member zawng zawng pian ni leh thla inang veka dah a tam em em a, January 1-a hrût rual tawp a ni," an ti.

MNF chuan, "Ration Card hi lehkha pawimawh, document tling, thil pawimawh tih dawna kan nihna tichiang tura leklam ngai a nih tawh a, phuailuai taka siam tir a ni hi a zahthlak," tiin, Supply Minister chu sorkar official-te mawhpuh lo a, a tihsualah pawm ngam tur leh thupha chawi turin an phût a ni.

Mizoram sorkar chu Food Security hman kawnga vuai-chàah MNF chuan puhin, "A taka hmang turin ruahmanna a muang em em a, Supply Minister mualphona a sang hle," an ti a; thingtlang khaw tam takah ration card peih a la nih loh avangin retailer-te’n buhfai an sem thei lo a, mi retheite fairêl bél a ruak mek niin an sawi bawk.