KHAWTHLIR

ZNP vice president

ZNP president Lalduh-oma chuan an party vice president atan C Laitanga leh Prof. Thangchungnunga te a ruat. PAC member atan K Liantuala, W Chhuanawma, Lalbiakzama, H Lal-
ṭanpuia, PC Vanlalruata leh Lalmuanpuia Punte te a ruat bakah, senior general secretary atan K Liantuala leh general secretary atan mi pakua a ruat bawk.

Tlân phal lo

Traffic SP chuan thupek chhuahin, Vaivakawn leh Bazar Bungkawn inkar kawngpui (kawng chung) siamṭhat mek chu lirthei tlante'n an rah chhiat leh ṭhin avangin kawngpui siam hna thawh zawh a nih hma chuan lirthei tlân phal a nih loh thu a puang.

MCCF Assembly

Mizoram Cancer Care Foundation (MCCF) chuan, nimin khan Dawrpui School mini auditorium-ah an pawl din champha an lawm a, Special Assembly an hmang nghal. Health principal director Dr K Ropari'n a hmanpui a, cancer natna do turin zûk leh hmuama fihlim leh ei leh inah fimkhur lehzual a ṭul thu a sawi.

Office rawk

Mamita AH&Vety office chu Nilaini zan khan rawk a ni a, DVO room-a safe a bo. Thu dawn danin, office rawktute hian tukverh leh bar-te kar chhiain a chhungah an lut a; safe an la a, safe-ah pawisa eng zat chiah nge awm hriat chian a ni lo. He thil thlengah hian Mamit police-te'n thubuai an ziak lut a, an chhui mek a ni.

World Kidney Day

Nimin kha World Kidney Day a ni a, Mizoramah pawh a ṭum khat nan Mizoram Kidney Transplant Association bultumin Tuikhuahtlanga PC Ramengzauva inah hman a ni. Day thupui chu 'Kal natna leh naupangte: Enkawl hma la, pumpelh rawh' tih a ni.

Nupui nei

Vanglaini news reporter Rochungnunga leh Remlalfaki, College Veng ve vete chu nimin chawhnu dar 1 khan College Veng Presbyterian kohhran biak-inah an innei.