NE Games-a medal late lawmpui

Mizoram State Sports Council (MSSC) chuan nimin khan March 2-7, 2016 chhunga Imphal, Manipur-a North East Games vawi 29-naa Mizoram aiawh tel medal late lawmpuina hun Khatla YMA Hall-ah an buatsaih a; Sports and Youth Services minister Zodintluanga leh parliamentary secretary (SYS) Hmingdailova Khiangte ten an hmanpui.

Lawmna inkhawm hi MSSC secretary C Laltlanthanga'n a kaihruai a; Zodintluanga chuan, Mizoram aiawha medal late chu an chhuan thu sawiin, "Kan lawm che u a. Manipur kawng hrang hranga kan el pha ta hi a lawmawm hle a ni," a ti.

Sports Minister chuan, infiamna chi tam takah mahni puala training-na tur la nei lo an awm a, ṭhenkhat chu YMA hall-ahte an inzir ṭhin tih sawiin, "Chuti chung chuan tun hi in thleng thei a ni. In tih theih sorkarin a hria a, hmunhma ṭha sorkarin a ngaihtuah mek zel," a ti a; judo hall neih thuai beisei a nih thu leh taekwondo hall sak zawh ṭep a nih thu a sawi.

Zodintluanga chuan, thiamna leh theihna piah lamah tih tak takna nena rilru pek lehzual a ngaih thu sawiin, "Tih theih bâk hreta ṭan lehin champion theih a ni. Tumruhna thar neih a ngai a, hmarchhak level-a duhtâwk loin, national leh international level-a tel phâk leh champion kan tum tur a ni," a ti a; infiam mite chu eng lai pawha ṭang mar reng tur leh theihtawp chhuah zel turin a chah a ni.

Inkhawmah hian chef-de-mission H Thangchungnunga, MSSC sports promotion officer-in Mizoram team-te inbuatsaih dan leh NE Games-a Mizoram dinhmun tlangpui a sawi. National Level North East Games hi sorkar laipuia Ministry of Youth Affairs and Sports scheme, Rajiv Gandhi Khel Abhiyan (RGKA) hnuaia buatsaih a ni a; hmarchhak state pariat aṭangin infiammi 920 leh official 100 an tel a ni.

Mizoram team chu a pumpuiah pahnihna an ni a; gold medal 17, silver medal 19 leh bronze medal 12 an la. Mizoram aiawha medal late hnenah hian MSSC chuan lawmpuina a hlan a ni.

NE Games 2016 result

Rank State Point

1st Manipur 310

2nd MIZORAM 164

3rd Tripura 122

4th Nagaland 110

5th Arunachal Pradesh 103

6th Assam 64

7th Meghalaya 55

8th Sikkim 27

Mizoram medal lak zat

Discipline Gold Silver Bronze Total

Judo 8 5 2 15

Boxing 4 5 7 16

Weightlifting 2 3 2 7

Athletics 2 2 0 4

Table Tennis 1 1 0 2

Hockey 0 2 0 2

Football 0 1 0 1

Badminton 0 0 1 1

TOTAL 17 19 12 48