Minister-in centre tur sak mek a tlawh

Industry minister H Rohluna chuan tun hnai khan Luangmuala Industrial Growth Apparel & Garment Manufacturing Centre sak mek a tlawh a, hnathawh a ṭhat tawk loh thu a sawi.

H Rohluna chuan, ṭha-laite'n eizawnna ngêlnghet zawk an neih theih nana Apparel & Garment Manufacturing Centre tur din a ni chu lawmawm a tih thu a sawi a, "Civil construction work lama hmalak danah duhthu a sâm lo a, siamṭhat ngaite a ṭul anga siamṭhat vat a ṭul," a ti.

Parliamentary secretary (Industries) Joseph Lalhimpuia pawhin, hnathawh tawh dan chu siamṭhat a nih loh chuan state sorkar tan enkawl a harsat a rin thu a sawi.

Apparel & Garment Manufacturing hmun Industrial Growth Centre sak hna hi sorkar laipui enkawl a ni a, hman theih tura sak zawh a nih veleh state sorkar kutah a awm dawn. He hmunah hian training-na tur building pathum a awm a ni.

Building pakhatnaah mi 105 leh khawl 105 a awm thei a, building pahnihnaah mi 95 leh khawl 95 awm theiin, building pathumnaah mi 105 leh khawl 105 a awm thei dawn a ni.