Mt. Everest láwn tur vai liam

Sorkar laipuia minister of state for Defence Rao Inderjit Singh chuan, nimin khan National Cadet Corps (NCC) hmeichhiate khawvela tlang sang ber Mount Everest-a lawn turte chu New Delhi aṭangin a vai liam. Mt. Everest lawn turte zingah hian Lalrintluangi d/o Lalbiaknipuia, Dawrpui Vengthar a tel.

Thu dawn danin, NCC girls cadet Mt. Everest-a láwn hmasa ber turte hi Col. Gaurav Karki chuan a hruai a; sipai 15 bakah, girl cadet 10 an ni. March 31, 2016-ah Nepal an thlen beisei a ni a, April 8-25 chhungin Base Camp-ah an awm beisei niin, May 15-25 chhungin tlang chhip an thlen theih beisei a ni.

NCC girls cadet Mt. Everest Expedition-a tel turte hi NCC chuan uluk takin a thlang a, tehna hrang hranga tling zinga mi 10 chu Mt. Everest láwn turin an thlang a ni. Mt. Everest láwn tur hmeichhia 10 zingah hian Mizo tleirawl, Lalrintluangi a tel a ni.