Larsapin Tuirial HEP hmun a tlawh

Governor Lt.Gen. Nirbhay Sharma chuan, nimin khan megawatt 60 pe chhuak thei tur, Tuirial Hydro Electric Power siam hna thawh mek a tlawh.

Larsap chuan, Tuirial HEP siamtu NEEPCO-te chu an hmasawnnate amah hrilh ṭhin tur leh Kolasib district hotute leh mipuite nen ṭha taka thawkho tur te, tualchhung mite hamṭhatna tur ngaihthah lo turin a chah a; Tuirial HEP chu Mizoram tan a pawimawh thu sawiin, a hun taka thawk zo hman turin NEEPCO hotute a hrilh.

NEEPCO hotute chuan, Governor hi tuikhuahna hmun hrang hrang an fanpui a, hna thawh tur awm zinga 82% chu thawh zawh a nih tawh thu an hrilh. Unit-I, megawatt 30 pe thei tur chu September, 2016-ah zawh hman an tum thu leh, kum 2017 chhungin unit-II pawh zawh hman an inbesei thu an sawi.

NEEPCO hotute chuan, Governor hnenah hian telecom network tihṭhat an mamawh thu leh Saiphai leh Saipum inkar kawngpui siamṭhat an mamawh thu an thlen a ni.

Governor Nirbhay Shar-ma hi a secretary Rod-ney L Ralte leh P&E engineer-in-chief L Pachuau ten an zui a; NEEPCO executive director MK Sharma leh head of project PK Bora leh engineer-te'n an lo dawngsawng a, Kolasib DC H Lalengmawia leh SP C Lalzahngoa ten an zui bawk.