KHAWTHLIR

Inkhawmpui

Mizoram Presbyterian Kohhran Hmeichhe Rorel Inkhawm vawi 8-na chu nizan khan Mission Vengthlang Kohhran biak-inah ṭan a ni a, vawiinah rorel inkhawm neih a ni ang a, nak zanah a ṭiak ang. Inkhawmpui thupui chu ‘Thlarau Thianghlim leh a hnathawh’ tih niin, speaker chu Rev. Lalrinmawia a ni.

SA training

Salvation Army India Eastern Territory chuan, March 7-11, 2016 chhung khan Aijal Club-ah Prepare Training an buatsaih a, mi 27 an tel. Salvation Army international headquarters, London aṭangin International Emergency Services coordinator Maj. Ann Thompson leh Emergency & Disaster facilitator Damaris Frick ten an zirtir a ni.

Digital classroom

Baptist Higher Secondary School, Serkawna digital classroom leh table tennis hall sak chu nimin khan Lunglei HPC vice chairman S Laldingliana'n a hawng. Digital class room leh TT hall sak nan hian S Laldingliana'n HPC fund aṭangin Rs. 11,50,000 a pe a, Baptist HSS-in Rs. 8,71,360 a tum thung.

Mipuite chah

Supply minister John Rotluangliana chuan nimin khan an party inkhawmah thu sawiin, Food Security hmang thei tur leh ration card thara tih dik loh awmte chu DCSO-ah leh storekeeper-ahte hriattir turin mipuite a chah.

KMMTTP enfiah

Kaladan Multi Modal Transit Transport Project kawng siam mek chu nimin khan Congress party ṭhalaite'n an presi-dent Vanlalawmpuii Chawngthu, MLA hoin an tlawh a; chak taka thawh a nih avangin lawmawm an tih thu an sawi. MPYCC hruaitute hi Myanmar ramri, Zorinpui thlengin an kal a ni.

Zúa fihlim turin chah

MNF president Zoramthanga chuan nimin khan Hnam Runah thu sawiin, an party mite chu zu zawrhna lak ata fihlîm tum vek turin a chah a, "MNF office hi ruih theih thil ti chunga lâwi luh a rem ve lo," a ti.