Champhai leh Saitualah Chapchar Kût hmang

Nimin khan Cham-phai leh Saitualah Chapchar Kut hman a ni. Champhaiah chuan parliamentary secretary TT Zothansanga Kût Pa a ni a, Saitualah chuan minister Zodintluanga Kût Pa niin, MLA PC Zoram Sangliana chu Kut Thlengtu a ni.

Zodintluanga chuan, hmanlai aṭang tawhin Mizote thinlungah Chap-char Kût a lian tih sawiin, "Chapchar Kut hi Mizote min phuar-khawmtu pawi-mawh tak a ni. Keini Mizote hian kan Mizona pholangtu zinga pakhat chu Chapchar Kût hi a ni a, a kum têlin kan hlut chho thar zel," a ti.

Khawvel changkanna sang zelah Mizote'n khawi lam kawng nge kan zawh tih ngaihtuah a ṭul thu sawiin, Minister chuan, "Kan ke pênna lam tur kan tihchian a ngai," a ti. Mizoah chian a ngaih thu sawiin, "Ram changkang zawkte tihdan kan zirna lamah kan Mizo identity bo vek khawpa hnam dang tihphung kan entawn chuan kan boral mai ang tih a hlauhawm," a ti a; ram changkang zawkte taimakna leh thawhrimna entawn a ṭul thu a sawi.

Mizote chu hnam hawihháwm ni ṭhin mah se, chu chu ṭhiah-in a awm mek tih sawi-in, Zodintluanga chuan, "Social media hrang hrang - facebook, whatsapp, telegram-ahte ṭawngkam hman duh zawng kan sûmkàr lo ta deuh em tih tur a ni ta. Tlawmngai, mihráng leh sahráng hmaa zâm ngai lo, ṭhian chhan thih ngam, mi huaisen tia sawi ṭhin hnam hian a hmingthatna hi a luah zo lo dawn ta em ni le? Hawh u, i ṭangrual ang u," a ti.

Chapchar Kût hi Champhaiah chuan KṬP General Conference an thlen avangin nimin khan Kahrawt Field-ah hman a ni a; Kût Pa TT Zothansanga chuan, "Chapchar Kut hi hlim taka kan lawm piah lamah hian taimak leh intodelh tumna min pe thartu ni thei se," tiin, Mizo ṭhalaite chu aia upate zahna kawnga ṭan la thar turin a fuih.

Champhai leh Saituala Chapchar Kût lawmnaah hian Mizo hnam lâm chi hrang hrang entir a nih bakah, zaithiamte an zai a ni.