Kum 80+ leh rualbanlote'n in lamah vote an thlâk mek

November 7, 2023-a MLA inthlanpui neih turah Election Commission of India (ECI) ruahman angin kum 80 chung lam leh pianphunga rualbanlo, vote thlâk tura polling station-a kal harsate tan an ina vote thlak theih turin ruahman a ni a, district ṭhenkhatah vote an thlak zawh tawh laiin, district ṭhenkhatah la tih mek zel a ni.

Chief Electoral Office pisa tarlan danin, Mizoramah kum 80 chung lam leh rualbanlo (persons with disabilities) mahni in lama vote thlak phalsak mi 2,095 an awm a, chu'ng zinga mi eng emaw zat chu vote thlaktir an ni tawh a, vote thlak tawh zat nimin tlai thlenga hriat tawh chu mi 545 an ni.

Saitual district-ah chuan October 26, 2023 khan in lamah vote thlaktir niin, zawh nghal a ni a; district chhunga bial pathum - Chalfilh, Ṭawi leh Lengtengahte in lam vote thlak thei mi 156 zinga mi 149-in vote an thlak.

Serchhip district-ah pawh October 26-28 chhungin home voting kalpui a ni a, bial pathum - Serchhip, Tuikum leh Hrangturzo-ahte mi 168-in vote an thlak a, Serchhip bialah mi 115, Tuikum bialah mi 28 leh Hrangturzo bialah mi 25 an ni.

Kolasib district-ah October 28, Inrinni khan vote thlaktir ṭan a ni a, October 28 bikah district chhunga bial pathum - Tuirial, Serlui leh Kolalsib-ahte mi 142 vote thlakin, kum 80 chung lam mi 123 leh rualbanlo mi 19 an ni. Nimin khan home voting chhunzawm a ni a, in lama vote thlak phalsak eng emaw zat an la awm a, vote thlaktu zat erawh hriat theih a la ni lo.

Aizawl district-ah chuan mahni ina vote thlak dil mi 916 an awm a, an ina kal chilha buaipui turin team 25 siam a ni. Nimin vêk khan inthlana duty tur police-te'n postal ballot hmangin vote an thlâk a, district election officer Nazuk Kumar-i'n vote thlak dan a enfiah.

Champhai district-ah pawh nimin khan home voting kalpui a nih bakah, polling official-te'n GM Higher Secondary School-ah postal ballot hmangin vote an thlâk ṭan. Champhai district-ah hian kum 80 chung lam mi 90-in in lama vote thlak an dil a, pianphunga rualbanlo zingah dil an awm lo. Nimin khan kum 80 chung lam mi 86-in vote an thlak a ni.

Khawzawl district-a Tuichang constituency-ah chuan nimin khan kum 80 chung lam leh rualbanlote an chenna inah kal chilhin postal ballot hmanga vote thlaktir an ni a, in lama vote thlak dil mi 142 zinga mi 112 chu phalsak an ni.

Lawngtlai district-ah chuan vawiin aṭangin home voting hi tih ṭan a ni dawn a, in lama vote thlak tur mi 103 an awm.

Siaha district-ah pawh home voting kalpui a ni a, vote thlaktu zat hriat a la ni lo. In lama vote thlak phalsak mi 153 an awm a, Saiha bialah mi 69 leh Palak bialah mi 84 an ni. Inthlan kaihhnawiha lirthei hman tur driver leh conductor mi 50-te pawhin Siaha district playground-ah nimin khan vote an thlak bawk.