Sum tichingpentu kum 4 táng tur leh nuai 100 chawi tura hrem a ni

Law & Judicial department-a LDC (muster roll) ṭhin Lydia Lalhruai-tluangi (32) d/o Lalhnehliana, Ramhlun North chu an department sum

Rs 1,06,90,916 a tihchingpen avangin Special Court (PC Act) chuan kum 4 táng tur leh Rs 1,00,00,000 (nuai 100) chawi turin a hrem a; pawisa a chawi loh chuan kum 50 táng turin a ti bawk.

Lydia Lalhruaitluangi thubuaiah hian special judge (Prevention of Corrution Act) Dr HTC Lalrinchhana chuan October 27, 2023 khan thutlukna siamin, thiam loh a lo chantir tawh a, nimin khan hremna tur a puang leh a ni.

Special Judge (PC Act) hian Lydia Lalhruaitluangi chu dan tlawhchhan panga - PC Act Section 13(1)(a)&(b) leh Section 13(2), IPC Section 406, 420, 468 leh 471 hnuaiah thiam loh a chantir vek a; heng dan panga hnuaiah hian kum 4 zel táng tur leh Rs 10,00,000 zel táng turin a hrem a, pawisa a chawi loh chuan kum 4 tang loin, kum 10 zel táng turin a ti bawk.

Hetih lai hian Special Court chuan Lydia Lalhruaitluangi chungah zahngaihna a lantir a; hmeichhia fa pahnih enkawl mek a nih avang leh a hmain thiam loh chantirna thubuai a la neih loh avangin a tàn hun tur kum 4 zel (a belh khawm kum 20) chu concurent-a kaltirin, thubuai pakhatah tan hun chhung kum 4-ah tlâk turin a ti a ni.

Pawisa a chawi tur leh pawisa a chawi loh avanga a tan hun tur erawh chu a hranpa zela kalin belh khawm (consecutive) a ni a; thubuai pangaa pawisa a chawi tur cheng nuai 10 zel chu belh khawmin, Rs 1,00,00,000 chawi tura tih a ni. Pawisa a chawi loh vanga a tàn hun pawhsei pawh belh khawmin, kum 50 tang tura tih a ni bawk.

Lydia Lalhruaitluangi hremna, pawisa chawitir tur tam lamah hian Special Court chuan PC Act, 1988 hnuaia Section 16-in a phût angin, sum a tihchingpen tam lam hisápa bituk a ni tih tarlan a ni.

Tarlan tawh angin, Law & Judicial department sum tihchingpen a awm nia hriain under secretary Lalhlimpuii Hmar-in kum 2018 khan Anti Corruption Bureau (ACB)-ah FIR a thehlut.

Lydia Lalhruaitluangi hian Law & Judicial-a a thawh lai, December 2015 aṭanga August 2018 chhungin department sum tam tham tak office bill lem, sanction order lem, a chunga thuneitute signature lem leh cash memo lemte a khawih chingpen a, a nu leh pa bakah a laizáwn bank account-ah Rs 1,06,90,916 a thun a, a mimal hlâwkna atan a hmang tih ACB chuan an hmu chhuak a ni.

Lydia Lalhruaitluangi hi a hna aṭangin August 21, 2018 khan bàn a lo ni tawh a; amah hi thiam loh chantira hrem a nih laiin, sum a thunna bank account neitu a pa Lalhnehliana, a nu Zothansangi leh a laizáwn Lalhlimpuii te erawh chu chhuah zalen an ni thung.