Vigilance Awareness Week hman a ni

Nimin khan India ram pumah Vigilance Awareness Week hman ṭan a ni a, Mizoramah pawh hmun hrang hrang hman a ni. Kumin Vigilance Week thupui chu 'Hlemhletna hnâwl la, ram tan thawk rawh' (Say no to corruption, commit to the nation) tih a ni.

Vigilance Awareness Week hi Aizawlah chuan chief secretary Dr Renu Sharma hoin Secretariat tualah sorkar hnuaia thawkte'n an hmang a; hlemhletna do a, mipui tana hna thawk turin thutiam (integrity pledge) an sawi rual a ni.

Vigilance Awareness Week 2023 hi November 5, 2023 thleng neih tur a ni a; integrity pledge-ah hian sorkar hnathawkte chuan hlemhletna an do tlat tur thu te, sorkar dan leh thupek anga dik leh felfai taka hnathawh an tum tur thu te, mipui rawngbawlna a ni tih hriain an nungchang leh hnathawh danahte mawihnai tak leh mi dangte entawn tlaka awm tur leh, hlemhletna thil an hmuh emaw, hriatte chu ngawihbosan mai loa sorkarah report ngei turin thu an tiam a ni.