MTA-in sum ûm lo turin an ngen

Pathian thu zir chhuakte intêl khawmna pawl, Mizo Theological Association (MTA) chuan November 7, 2023-a MLA inthlanpui awm tur pualin thuchah an tichhuak a; sum hmachhuan leh sum ûma thil ti lo turin mi tin an ngen a, vote thlâk ṭheuh turin vote nei zawng zawng an ngen bawk.

MTA chuan, dik taka rorel tur mi chuan dan dik takin lalna chan tumin an bei ṭhin tih tarlangin, "Dâwt leh inbumna, mite sawichhiatna leh hmanraw dik lo pawh hmang hreh lo mi chuan dik taka ro a rêl theih a beiseiawm loh avangin chutiang tih chíngte chu i hnâwl ang u," an ti.

MTA chuan, MLA candidate emaw, an ṭhuihruaite emaw aṭanga sum leh therhlo dil lo turin mimal leh pawl tin an ngen a, "Sum leh therhlo hmang emaw, thil inpek tiam emaw zawnga campaign hi a tling lo tan insèn thlawnna a ni a, a tling tan pawh sum sèn tawh rulh lehna tura mipui sum dik lo taka hman sualtirtu a ni ṭhin," tiin, sum leh therhlo hmanga campaign lo turin an ngen.

MIZO THEOLOGICAL ASSOCIATION THUCHAH

1. Ram roreltu ni tura kan beihna leh roreltu tur kan thlannaah ram leh rorelna hi Pathian thuneihna hnuaia mi a ni tih i hre reng ang u.

2. Kan duh thlanna thiang hruai khawlo thei, sum leh pai leh therhlo emaw chi leh sakhaw bil nihna emaw, a bika kan hlâwkna tur emaw ngaihtuahnate dahṭhain kan rilru duh thlanna thianghlim takin ram tana ṭha ber tur nia kan hriat thlang ngam ang u.

3. Sum hian rorelna a hruai dik lo sam hle a ni tih hriain, sum hmachhuan leh sum ûma eng mah ti lo turin i fimkhur ang u.

4. Dik taka rorel tur mi chuan dan dik takin lalna chan tumin a bei ang. Dâwt leh inbumna, mite sawichhiatna leh hmanraw dik lo pawh hmang hreh lo mi chuan dik taka ro a rêl theih a beiseiawm loh avangin chutiang tih chíngte chu i hnâwl ang u.

5. Ram roreltu tura inpete aṭanga beiseina dik lo neih hi mipuiin roreltute an hruai sualna a ni ṭhin. Mimal leh eng pawl mahin MLA candidate emaw an ṭhuihruaite emaw hnena sum leh therhlo dil hi thil ṭha lo a ni.

6. Chi leh sakhua (kohhran) inkara inhuatna thlen thei zawng emaw, mimal hlâwkna tur zawnga chi bing leh sakhaw pawl rilru chawk tho zawnga politics hman hi a ṭha lo a, mi tlemte hlâwkna tura mi tam tak buaina thlen ṭhintu a nih avangin i invéng ang u.

7. Dan loa sumdawngte leh ruihhloa sumdawngte nena engti kawng maha inthurual lo turin party tin leh candidate zawng zawng kan ngen a; hetiang mite puihna sum leh pai pawh hnâwl ngam turin kan inngen.

8. Kan sakhua leh chanchin ṭha nêk chêp thei tur pawlte nen inthlan hma leh inthlan hnuah thawk dun lo turin kan inngen.