Youth Oriented SEDP hmangin ṭhalaite khai chhuah kan tum - MNF

MNF hruaitute chuan nimin khan Aizawl Press Club-ah thuthar thehdarhtute an kâwm a; Youth Oriented SEDP hmangin ṭhalaite khaichhuah an tum thu an sawi.

MNF adviser Prof. F Lalnunmawia chuan, an party election manifesto-a an tarlan pawimawh leh langsar tak chu ṭhalaite eizawnna leh hna bul ṭanpuina tur Youth Oriented SEDP a nih thu a sawi a, "A tum ber chu Zoram ṭhalai eizawnna nghet nei lote tana eizawnna kawng kawhhmuh leh chumi atana an bul ṭanna tur sum ngaihtuah a ni," a ti.

Youth Oriented SEDP-ah ṭhalai'n theihna an neih ṭhatnate hriat chian tum a nih tur thu sawiin F Lalnunmawia chuan, "An thiamna leh theihnate hna leh sum leh paia chantir tura hmalak kan tum. Planning leh LESDE department leh Mizoram Youth Commission hmang ṭangkaiin mumal taka kalpui a ni ang," a ti a, budget-ah sum tam zawk dah an tum thu a sawi.

Prof. F Lalnunmawia chuan, Youth Oriented SEDP kalpui turah mimal, ṭhian leh pawl anga eizawnna kawnga hmalakna tur ngaihtuahpui an tum thu sawiin, "He lama tui mi ṭhalaiten an tuina leh hnathawh duhzawng (trade)-ah project plan siamin sorkarah an thehlut ang a, chung project chu sorkarin an bul ṭanna tur sum a ngaihtuahsak ang," a ti.

Zawhna chhangin F Lalnunmawia chuan, Youth Oriented SEDP-ah a dawngtu tura thlante tan sum bituk zat a awm lo a, an project a zir zelin sum ruahman a nih dawn thu a sawi.