BJP nen thawhho kan tum loh thu resolution kan siam tawh - Sapdanga

ZPM working president K Sapdanga chuan, party ṭhenkhatin ZPM chu BJP nena sorkar siam tuma an puhna chungchangah, May 17, 2023 khan ZPM Headquarters Executive Committee-in BJP nen thawhho an tum lo tih resolution siamin an puan tawh thu a sawi.

Nimina ZPM pisaa inkhawmah thu sawiin K Sapdanga chuan, "BJP nena sorkar siam tumah min puh a, May 17, 2023-a Headquarters Executive Committee chuan BJP nen thawhho kan tum loh thu resolution kan lo siam tawh. Eng ang pawhin min puh mah se, min puhtute pawhin an awih lo a, BJP pawhin an awih lo a, keini phei chuan kan awih lo lehzual. Sorkar inring lote'n sorkar inṭâwm a awm dawn tiin party mal sorkar siam phak an awm dawn loh thu an vawrh darh a, vawi khat mah coalition sorkar a la piang lo," a ti.

K Sapdanga chuan, political party pahnihin na takin ZPM an beih rawn tih sawiin, "Kan hotupa Pu Duhoma sawichhiatna atan press conference an ko hial a, MLA fund eiruah rin thuin an puh, a eiruk lohzia finfiahna kan hmu nghal," a ti a; Lalduhoma thusawi a tluan tling loa tan chhumin an thehdarhsak nasat thu a sawi.

Corruption laka fihlim turin ZPM candidate-te an intiam tih sawiin Sapdanga chuan, "Kan intiam angin hlemhletna lakah kan fihlim em tih mipui fiah turin kan inchhawp chhuak ngam a, ram rorelnaa Pathian ram tun din kan tum a, chu chu kan tum no.1 a ni a, min fiah a, min enchhin turin mipui kan sáwm... Hlemhletna laka roreltute an fihlim phawt chuan, a hnuai lamah corruption hi a tlangnêl theih kan ring lo. Hmasawnna a tàn tlat chhan chu eirukna vang a ni a, corruption tel loin fim takin ram kan kaihruai dawn," a ti.

K Sapdanga chuan, party hlun pahnihin nasa taka an beih rawn karah ZPM thli a tleh zel tih sawiin, "Party thli tleh a piangte'n sorkarna an chang ṭhin," a ti a; inthlan puan hnu, SEDP sem theih loh hnuah ZPM-in member thar 10,000 chuang an neih belh tawh a, a tam ber chu MNF aṭangin a nih thu a sawi bawk.