Congress thupuangtuin thawh dun tumah ZPM leh BJP a puh

Mizoram Pradesh Cong-ress Committee thupuang-tu (chief spokesman) Ronald Sapa Tlau chuan nimin khan Aizawl Press Club-ah thuthar thehdarhtute a kâwm a; BJP leh ZPM chu sorkarna siam tura thawh dun tumah a puh.

Ronald Sapa Tlau chuan, Delhi-a BJP hmunpui lamin Mizoramah BJP chu sorkar lamah an ṭang dawn tih an puang a, BJP National President-in an sorkar chuan MNF sorkara SEDP-a eirûkna tam lutuk leh financial mismanage-ment-te chhuitir an tum tih a puang bawk tih a sawi a, "MNF-in Delhi lama BJP-in MNF chu hmelma doa an do tak thu an puang ve thung. BJP-in an candidate pakhat deputy chief minister a nih tur thu an puan hmak ngam aṭang hian tun hnaia an rawn beih MNF ni lo, regional party dang thawhpui atan biak rem an nei tawh a ni ang," a ti.

BJP-in MNF ni lo thawhpui theih an neih chu ZPM an nia sawiin Ronald Sapa chuan, "ZPM-in BJP an la sawichhe hauh lote leh BJP-in an thawhpui tur an rawn tiualau ta mai hian mipui mak tih a hlawh hle," a ti bawk.

Ronald Sapa chuan, chief minister atana zawrh mi pathum - Zoramthanga, Lalduhoma leh Lalsawta te chu an zahawm a, chawimawi phú ṭhah an nia a hriat thu a sawi a, "Pu Lalsawta hi Congress party manifesto a vaia tihhlaawhtlin tum tlat a ni," tiin, Congress party thlang turin mipui a ngen a ni.