Candidate-te sum hman endik a ni; District-ah EVM chinfel hna chhunzawm

Nimin khan Kolasib leh Hnahthial district-ah expenditure observer hoin candidate-te sum hmanna endik thawh hnihna neih a ni. Khawzawl leh Hnahthial district-ah electronic voting machine (EVM) chinfel a ni bawk.

MLA candidate-te sum hmanna bank account Kolasib-a endik thawh hnihna hi DC conference hall-ah expenditure observer Karni Dan hoin neih a ni. Kolasib district MLA bial pathuma candidate mi 13 expenditure agent-te account vawn dan endik niin, Expenditure Monitoring Team-in candidate-te senso an chhinchhiah nen enmil a ni a, siam rem ngaite siam rem a ni.

Hnahthialah chuan Accounting Team room-ah expenditure observer Bal Krishan Gopal hoin candidate-te sum hman dan endik a ni a; political party-a expenditure agent-te ni tin sum hman chhinchhiahna register, cash register, bank register, bank statement leh voucher-te endik a ni.

Hnahthial district-a South Tuipui constituency chhunga polling station hrang hranga hman tur EVM khawlte chu DC conference hall-ah nimin khan chinfel a ni a; inthlan kaihhnawih sorkar hotute bakah, political party aiawhte leh chanchinbumite an tel.

Khawzawl DC conference hall-ah pawh Tuichang constituency-a polling station hrang hranga hman tur EVM, control unit, balloting unit leh voter verifiable paper audit trail thlan tawhte chu inthlan nía hman theih tawh tura buatsaih a ni a; chinfel zawhah strong room-ah dah luh niin, inthlan níah chauh lak chhuah a ni tawh ang.

Nimin vêk khan Champhai leh Kolasib-ah polling official-te training thawh hnihna buatsaih a ni a; training zawhah postal ballot hmangin vote an thlâk nghal a ni.