CEO leh SVEEP state icon-te inkâwm

Chief electoral officer Madhup Vyas chuan nimin khan a pisaah Mizoram Legislative Assembly inthlanpui November 7, 2023-a neih tura SVEEP state icon-te a kâwm a; electoral roll-ah ṭhalai vote nei thar mi 50,751 an inziah luh thu leh ṭhalaite'n vote thlak an ngaih pawimawh theih nan ṭan lak a ṭul thu a sawi.

Madhup Vyas chuan, SVEEP state icon-te chu inthlan kaihhnawih hriat tur pawimawhte leh vote thlak tura khua leh tuite zirtir leh hrilhfiah tura beisei an nih thu sawiin, "Mizoram hi ziak leh chhiar thiam tamna leh tlawmngai pawl chak tak awmna a ni a, kan vaia ṭanrualna hmangin vote tlak ṭhatna ber state kan siam thei," a ti.

Inkawmhonaah hian additional CEO H Lianzela, deputy CEO Henry C Lalrawnkima leh sorkar hotu dangte pawh an tel a; vote thlak tam lam (voter turn out) tisang tura hmalakho dan turte sawiho niin, media platform hrang hrang hman ṭangkai a ṭul thu leh ṭhahnemngai taka mipuite zirtirna kalpui a pawimawh thu tarlan a ni.

SVEEP state icon-te chu S Malsawm-tluanga, DJ Lalvenhimi, Teresa Rodingliani, Zorinsanga Sailo, Angelina VL Hriatpuii, Zothankimi, VL Hmangaihdawngkima, Zorinpuii Hlawndo leh Lalbuatsaiha te an ni.