DEO-in MUP hruaitute a kâwm

Aizawl district election officer Nazuk Kumar chuan nimin khan DC conference hall-ah Systematic Voters Education and Electoral Participation (SVEEP) bawhzui nan Mizoram Upa Pawl (MUP) hruaitute a kâwm a, MUP member tam thei ang berin vote an thlâk theih nan hma lakpuiah a sáwm.

DEO chuan, ECI-in kum 60 chung lamte'n kim taka vote an thlak a ngai pawimawh tih sawiin, "Kum upate hi ram political history thui tak hria, mahni mit ngeia lo hmu tawh an nih avangin an vote a hlu hle a ni," a ti a; mahni ina vote thlak tura hming pe, electoral roll-a an hming inziah dan nen inmil loh vanga hnâwl ngai mi ṭhenkhat an awm thu a sawi.

Nazuk Kumar chuan, taksaa harsatna nei, home voting dil lo emaw, ti thei lo an awm chuan an bialtu BLO-te nen inbe pawp a, a ṭul anga remchanna siam turin Election office an inpeih reng thu a sawi bawk.