Covid-19 vangin agriculture-ah hmasawn phah kan inbeisei - Agriculture Minister

Vanglaini palai zawhna chhangin C Lalrinsanga chuan, buh leh thlai thar chhuah bikah chuan Mizoramin Covid-19 a tawrh an rin loh thu a sawi a, "Agriculture ka chan hmasak zawka mipui rilrua ka tuh hleih theih loh, ei leh bara in­to­delh pawimawhna leh ṭul­na chu Covid-19 hian Mizo mipui thinlungah a tuh a, a lawmawm tak zet. Chuvangin, agriculture lamah hma kan sawn kan inbeisei," a ti a; Covid-19 chuan agriculture lamah boruak a chawikân hluai thu a sawi.

Agriculture Minister chuan, Mizo pi leh pute hun laiin kum khat daih buh an thar chuan a tâwk deuh mai tih sawiin, "Tunlaiah chuan mamawh chi hrang hrang a tam tawh hle a, khamkhawp buh thar ringawt a tâwk tawh lo. Covid-19 a awm hnuah erawh mipuite'n thil dang zawng aiin ei leh in tur an ngaihtuah ber a, sum tam tak neih a, ei tur neih loh kan hlau tlang. Mi tam takin a theihna hmun apiangah thlai an chíng a, a theih ang ang thar chhuah kan tum hlawm a ni," a ti.

Kum dang zawng aiin kuminah buh leh thlai thar tam beisei a nih thu sawiin Minister chuan, "Buhah chuan kan khamkhawp kan thar nghal kherin a rinawm loh. Kan thlai thar chhuahte a tam dawn avangin a dahṭhatna tur a pawimawh dawn a, thlai dahṭhatna tur kan buaipui mek a ni," a ti a; mi hrang hrangin an theih ang anga thlai thar tuma hma an lak avangin kum dang aiin kuminah thlai man a tlàwm theih thu a sawi.

C Lalrinsanga chuan, Mizo­rama leilet tam tak chu ram neitute'n hnam dang an enkawltir tih sawiin, "Buh an thar chhuahah ram neitute'n chanvo an nei a, tam tak chuan an chanvo pawh buha la loin, pawisain an la ṭhin. Hnam dangte hian Mizorama buh tharte chu state páwnah an hralh leh ṭhin a ni. Mizorama buh tharte hi state páwna phurh chhuah a, hralh a nih tawh loh nan hmalak kan tum. Kan rama thar chhuahte hi kan ramah ngei kan ei tur a ni," a ti. 

•    Mizorama buh tharte state danga phurh chhuah a nih loh nan hma kan la dawn

•    Agriculture lama mithiamte leilet awmna hmunah awm chilhtir kan rilrûk

•    Covid-19 in ei leh bara intodelh duhna Mizo mipui rilruah a tuh

•    Kum dang aiin buh leh thlai kan thar chhuah tam kan beisei

•    Agriculture leh irrigation kaihhnawihah project 20 chuang central-ah kan thehlut tawh

Agriculture Minister sawi danin, Mizorama buh thar chhuahte state páwna hralh a nih loh nan hmalak dan tur enin amah pawhin leilet hmunte a tlawh tawh. Tunlai hian Agriculture department-a thawktute chu director hoin leilet awmna hmunahte kalin, hmalak dan tur an zir chiang mek. Leilet hmunahte chuan kum­in bik atan hmun hrang hranga agriculture lama mithiam awm mekte pawh awm chilh tura dah rih rilrûk a ni.

Covid-19 vangin agriculture lamah chuan sum hmuh a tlem phah loh an beisei thu sawiin C Lalrinsanga chuan, "Central sorkar hian Covid-19 vang­in agriculture leh irrigation lam a ngai pawimawh zual a, chuvang­in, sector dang ai chuan kan sum hmuh pawh a tlakhniam loh kan beisei. Chief Minister-in min tuipui a, Covid-19 hnuah central-ah agriculture leh irrigation kaihhnawihah project 20 chuang kan thehlut tawh," a ti a; an project thehluhte a hlawhtlin theih nan DoNER Minister-in hmalakpui a tum thu 

a sawi.