Postal ballot-in vote thlak mek a ni

MLA inthlanpuiah vote thlak tura polling station-a kal harsatte tan in lama vote thlakna, home voting Mizorama district hrang hrangah kalpui mek a ni a; October 30, 2023 thleng khan in lamah postal polling hmangin mi 602-in vote an thlâk tawh a, inthlana duty tur mi 2,805-in vote an thlak tawh bawk.

Pianphunga rualbanlo (persons with disabilities) leh kum 80 chung lam, polling station-a kal harsatte chu an in lama vote thlak phalsak an ni a, dilna an thlen hnuah thuneitute'n in lama vote thlak phalsakte chu kar hmasa aṭang khan vote thlaktir ṭan an ni.

Mizoram additional chief electoral officer H Lianzela tarlan danin, kum 80 chung lam leh rualbanlote tana home voting kalpuiah hian October 30, 2023 thleng khan mi 602-in vote an thlak tawh.

Inthlan kaihhnawiha duty tur hrang hrangte chu postal ballot hmangin facilitation centre hrang hrangah vote thlâktir mek zel a ni bawk a, October 30 thleng khan duty tur mi 2,203-in vote an thlak tawh a ni.

District hrang hranga home voting leh duty turte vote thlak hun hi a inang vek lo a, district thuneitute'n ruahmanna an siam angin kalpui a ni.

Nimin khan Lawngtlai district-ah home voting kalpui ṭan a ni a, home voting buaipuitu turte chu zing lamah DC pisa tual aṭangin vailiam an ni. Lawngtlai district-ah hian home voting kalpui tur hian mobile polling team pali ruahman a ni a; in lama vote thlâk tur Tuichawng bialah mi 13, Lawngtlai West-ah mi 11 leh Lawngtlai East-ah mi 79 an awm a ni.