MLA inthlan vote chhiar ní sawn tura ngenna bawhzui

Mizoram Kohhran Hruaitute Committee (MKHC) chuan MKHC leh pawl hrang hrangin Mizoram inthlanpui vote chhiar hun sawn tura Election Commission of India (ECI) an ngennaah ECI aṭanga chhanna a la awm loh avangin hmalak zel dan tur sawihopuiah páwl hrang hrang an sáwm.

MKHC hruaitute October 30, Thawhṭanni zana ṭhukhawm chuan inthlan vote chhiar ni sawn tura an ngenna chu ECI-in tun thlenga an la chhàn loh avangin hmalak zel dan tur an ngaihtuah a; MKHC chauhin hma la loin, NGO Coordination Committee, Mizoram People Forum leh political party-te nen hma an lâkho theih nan hmalak dan tur sawihopuiah an sáwm a ni.

MKHC hian joint meeting neih hun atan November 2, Ningani zan leh a hmun atan Synod Office-a Devotion Hall an ruat a; pawl hrang hrang aṭangin aiawh mi pathum aia tlem lo tel turin an ngen a ni.