KHAWTHLIR

Thisen pe

Congress party ṭhalaite chuan prime minister hlui Indira Gandhi thih chhampha pualin nimin khan Congress Bhavan-ah thisen pek rûnpui an huaihawt a, Civil Hospital, Aizawl tan mipa 48 leh hmeichhia 10-in thisen an pe. Saiha Higher Secondary School NSS pawhin Siaha District Hospital-ah mipa 20 leh hmeichhia parukin an thisen an pe bawk.

Kawng khâr dawn

Ramthar Veng Sihpui aṭanga Ramhlun Vengthar bus turning point, Darnam lui peng leh Bishop House inkar kawng chu vawiin aṭangin siamṭhat a ni dawn. Kawng siam chhungin kawng khàr a ni dawn a, kawngpuiah lirthei leh bungrua dah phal a ni lo.

Vote thlak inzirtir

Serchhip District Election Office chuan October 39, Thawhṭanni zanah khan New Serchhip VC House-ah MUP member-te tan vote thlak pawimawhzia inzirtirna an buatsaih a, Tuikum constituency ARO Stephen Auhmun in thil pawimawh hrang hrang a hrilhfiah bakah, zawhna leh chhanna hun hman a ni.

Sawihona buatsaih

Kolkata-a US Consulate leh Contact Base ṭang dun chuan Mizorama consultancy group-te pualin nimin khan Aijal Club-ah hnathawhnaa hmeichhiate dinhmun chawi kân chungchang sawihona an buatsaih a, entrepreneur hmeichhia mi 25 an tel.

Tuiah tlahlum

Emily Vanlaldinpuii (6) d/o Lalchhantluanga chu October 30, Thawhṭanni tlai dar 3 vel khan tuiah a tlahlum a, nimin chawhma dar 11 khan vuiliam a ni. Emily hi a ṭhiante nen sikul banah lui kal tum an ni a, an ṭhian pakhat lui aṭanga hla lotea awm an sawmlaiin amahin luiah hian lo zuk kalin, a ṭhiante an thlen chuan tuiah lo chesual tawh. Lak chhuah a nihin a lo thi tawh a ni.