Mizoramah BJP a sorkar chuan state nuam berah kan siam dawn - Kiren Rijiju

Sorkar laipuia minister leh Mizoram inthlanpui awm tura BJP-in Mizoram vil tura an ruat Kiren Rijiju chuan, Congress party kaihhruai sorkarin kum 60 chhung hmarchhak state-te an rahbeh hnuah BJP kaihhruai sorkarin hmarchhak state-te a humhim a, hmasawnna nasa takin a thlentir thu leh, Mizoramah BJP-in sorkarna a chan chuan Mizoram chu India rama state nuam berah an siam dawn thu a sawi.

Kiren Rijiju hian nimin khan Hotel Regency-ah thuthar thehdarhtute a kâwm a; India hmarchhaka ramri bul khuate BJP sorkarin a ngai pawimawh nia sawiin, "Ramri hnaiha khuate hi India rama first village-te an ni kan ti. Mizoramah BJP-in sorkarna a chan phawt chuan Mizoram hi India rama state hmasawn leh nuam berah kan siam dawn a ni," a ti a; BJP-in India rama hmasawnna a thlente ngaihtuah chiansak turin Mizo mipui a ngen.

Kiren Rijiju chuan, Congress sorkar hnuaiah kum 60 chhung hmarchhak state-te rahbeh an nia sawiin, "Congress-te hian tribal-te an ngai pawimawh lo a, kum 60 chhung an rapbet. PM Modi sorkar chuan hmarchhak state-te a ngaihsak em em a, Delhi Police-ah NE mite vil tur bik special cell din a ni a, Delhi Police-ah NE ṭhalai tam tak lak an ni. Modi sorkar hian NE mite nasa takin a humhalh," a ti.

Congress party hruaitu Jairam Maresh-a'n BJP sorkar hnuaiah Mizoram humhimna Article 371G a him lo nia a sawi chungchang zawhna chhangin Rijiju chuan, "Article 371G ṭhiat tur anga a sawi hi a vanduaithlak hle. BJP chuan hmarchhak state-te humhimna Article 371 hi a ṭhiat dawn lo a, a humhim dawn. A chhan chu tribal hnamte hnam nunphung leh chin dante humhalhna a ni," a ti a; Jammu & Kashmir puala siam Article 370 nen a inang lo niin a sawi.

BJP chu Kristiante tan a him lo nia puhna chungchangah Rijiju chuan, "Mizoramah hian BJP sorkar ta se, chief minister chu Mizo tho a ni dawn. Chu Mizo CM chu Kristiante tan a him lo ang em? Nagaland leh Meghalaya-te pawh Kristian state an ni a, BJP telna state sorkar an ni a, Kristiante tan an hlauhawm loh a ni lo'm ni? BJP-in hna a thawh ṭhat avangin kan hnathawhah BJP beihna tur a awm lo a, an beih theihna awm chhun nia an hriat Kristiante tan an hlauhawm tiin min bei a ni," a ti.