BJP-in na takin MNF min bei - MNF Media

MNF Media & Publicity department chuan nimin khan Aizawl Press Club-ah thuthar thehdarhtute an kâwm a; BJP-in na takin MNF an bei niin an sawi.

MNF Media general secretary VL Krosshnehzova chuan, NDA-a MNF an tel ve chhan chu BJP nena inzawm vang ni loin, Congress duh leh duh lo intél khawm pahniha Congress duh lo lam an nih vang niin a sawi a, "MNF chu NDA thuhnuaiah a awm lo a, issue base zela kal a ni. Mizoram tana ṭha lo an tih chuan a dodal mai a, a dodal zel dawn bawk," a ti.

VL Krosshnehzova chuan, NDA kaihruaitu BJP-in an duh duhin MNF leh Mizoram sorkar a ti thei lo tih an hriat chian tawh avangin Mizoram inthlanpui awm turah hian MNF chu rálpui phiarin an phiar a, na takin an bei ta niin a sawi a, "An khingpui ber Congress chu eng ruai an ni dawn lo tih an hmuh avangin an bei lem lo. ZPM phei chu engtin mah an bei lo a, sawisel zawngin ṭawng an chheh miah lo," tiin, BJP leh ZPM chu hnung thak inhiat tawnah a puh.

MNF Media GS chuan, Manipur-a Zo hnahthlakte nuai chimih tum a nia sawiin, chu chu duh loin MNF MP pahnih C Lalrosanga leh K Vanlalvena ten Manipur-a Mizote tawrhna chungchang Parliament-ah sawi chhuah an tum tih a sawi a, "Vawi khat mah phalsak an ni lo. Chu bakah, NDA MP-te inhmuhkhawmnaah pawh sawi chhuah an remtih loh avangin a hnu lamah chuan NDA inhmuhkhawmnaah an tel loh phah," a ti.

Krosshnehzova chuan, MNF-in Uniform Civil Code (UCC) an duh loh thu sawiin, "Parliament chhung leh páwnah kan MP-te'n an dodal bakah, kan CM leh MNF President pawhin National Law Commission-ah Mizoram leh mipuiin an duh lo a, an dodal thu a thlen," a ti a, political party zingah UCC duh loh thu ziaka thlen hmasa ber an nih thu a sawi.

Mizoram MP-te'n Citizen Amendment Bill an thlàwp chhan sawiin MNF Media GS chuan, "BJP leh a thurualpuite'n an MP ngahna hmangin an pass tho dawn tih hriat a ni a, Mizoram leh hmarchhak state-ahte hman a nih ve dawn loh thu tihchian a nih vang chauh a ni. A ngai ang ang kha chuan vote hmangin kan MP-in a dodal ngei ang," a ti.

MNF MEDIA SAWI DANGTE

▶ Myanmar aṭanga raltlan rawn lutte sorkar laipuiin thawn lêt vek turin Mizoram sorkar a hriattir a, mahse, Mizoram sorkarin a hnawl a, ráltlânte a lo tuamhlâwm zawk. Myanmar raltlan 30,000 chuang Mizoramah enkawl mek a ni a, state sorkar sum cheng nuai 380 hman a ni tawh.

▶ Bangladesh aṭanga Zo hnahthlak raltlân mi 1,000 vel pawh BSF-te'n luh phal lo mah se, Mizoram sorkarin luh phalsak tura a tih avangin Mizoramah tuamhlâwm mek an ni.

▶ ZPM leh BJP te inthlan hmain langsar taka thawhho an nei lo. Mahse, inthlan zawhah sorkarna siam thei awm lo se, BJP an thawhpui ang em tia zawhnaah Pu Lalduhoma'n, inthlan hnu lam chu hunin a hrilh ang tih bakin a chhang duh lo.

▶ Assam nen ramria kan buainaah MNF sorkarin huai takin a do lêt a, silai hmeh puah a ni. BJP sorkar, Assam CM Himanta leh a kaihhruai party chuan MNF hi min do dawn tih hriat sa a ni.

▶ Tun hnaiah ZPM candidate-te'n sum an ui lo thar hle tih thâwm a ri ring ta hle. BJP leh a puanhnuai sangawi zawnpuite hi kan vulh len palh kan hlau takzet.