MNF hna pui ber - ZPM Leader beih - ZPM GS

ZPM party chuan, MNF party chu ram tana an hmachhawp leh tih an tumte sawi ngam loah puhin, ZPM Leader beih chu hna pui berah an nei tawh thu leh kumin MLA inthlanpuia an elpui ber chu rorel lai MNF party an nih thu an sawi.

ZPM hruaitute'n nimin khan Aizawl Press Club-ah thuthar thehdarhtute an kâwm a; general secretary Eddy Zosangliana Colney chuan, MNF hi party upa tawh tak, tawnhriat nei ṭha tawh leh inthlan vawi tam tak paltlang tawh an nih thu sawiin, "Hun hmasa lama an khawsak tawh danah an hlawhchham chian em avang leh mipui min bum fin zawh tawh avangin ram tana an hmachhawp te, ram tana an tih tumte an sawi ngam tawh lo a, an sawi tur hre loin ZPM Leader beih chu hna pui berah an nei ta a ni," a ti.

Eddy Zosangliana chuan, MNF party hian kum 2018 inthlan dawna nasa taka an intiamnate tihlawhtling se chuan tun anga an khawsak hi a ngai dawn lo tih a sawi a, "Anmahni tuh rah an seng a, anmahni thangah an âwk a ni," tiin, an buai zawh tâk phah niin a sawi.

ZPM General Secretary chuan, ZPM boruak a len zel thu sawiin, "Sorkar mai tur anga thâwm a rin chhoh zel avang te, inthlan a zawh hma chuan kan sorkar hlaua dâwt, thu dik lo phuah chawp leh lemchan chawp hmanga min beitu an pung zel dawn. Heng thilte avang hian mangang lo tur leh chî-âi lo turin mipui ka chah a ni," a ti a; MLA inthlanpuiah ZPM candidate-te vote ṭheuh turin Mizoram mipui a sawm bawk.